Թուրքական Anadolu լրատվական գործակալության փոխանցմամբ՝ Չինաստանում G20-ի գագաթնաժողովին մասնակցելու նպատակով Չինաստանում գտնվող Թուրքիայի նախագահ Ռեջեփ Էրդողանը հարցազրույց է տվել Չինաստանի Կենտրոնական հեռուստատեսությանը (CCTV), որի ժամանակ հայտարարել է, որ Անթալիայում նախորդ տարի անցկացված G20-ի գագաթնաժողովից հետո օրակարգում շարունակում են մնալ միգրացիոն ճգնաժամն ու ահաբեկչության դեմ պայքարը։
Նրա խոսքով՝ Անթալիայում G20-ի գագաթնաժողովի հիմնական թեմաներից մեկը եղել է նաև կանանց զբաղվածության հարցը, մինչդեռ ներկայումս հիմնական խնդիրը միջազգային կայունությունն է՝ ահաբեկչության ու փախստականների ճգնաժամի հարցերի լուծումը։
Էրդողանն անընդունելի է համարել ահաբեկչական կազմակերպությունների հանդեպ երկակի մոտեցումներ ցուցաբերելը: «Չեն կարող լինել լավ կամ վատ ահաբեկիչներ։ Բոլոր ահաբեկիչներն էլ վատն են։
Այլ կերպ ասած՝ մենք պետք է միմյանց հետ համագործակցելով ի ցույց դնենք մեր սկզբունքային ներդաշնակությունը ահաբեկչության դեմ պայքարում։ Մենք տարբերություն չենք տեսնում ահաբեկչական կազմակերպությունների միջև և նրանց դեմ պայքարում ենք այդ տեսանկյունից»,- ասել է Էրդողանը։
