Բացառված չէ, որ խոշոր միջազգային դերակատարները փորձեն աշխարհաքաղաքական գալիք զարգացումներին համահունչ իրավիճակ ստեղծել նաև ԼՂ հակամարտության գոտում: Այս մասին «Առաջին լրատվական»-ի հետ զրույցում ասաց ԼՂՀ ԱԳ նախկին նախարար, վերլուծաբան Արման Մելիքյանն՝ անդրադառնալով Մինսկի խմբի համանախագահների՝ շաբաթ օրը Վիեննայում հրապարակած հայտարարությանը, որով նրանք անդրադարձել էին կողմերի ամենաբարձր մակարդակով հանդիպման անհրաժեշտությանը:
Արման Մելիքյանը նշեց, որ առաջիկա երկու-երեք տարիների ընթացքում աշխարհաքաղաքական զարգացումների նոր փուլ է սկսվելու մեզ հարևան տարածաշրջաններում: Ուստի, ըստ նրա, բացառված չէ, որ խոշոր միջազգային դերակատարները փորձեն գալիք զարգացումներին համահունչ իրավիճակ ստեղծել նաև ԼՂ հակամարտության գոտում: Նա նշեց, որ հիմա այդ մասին առավել մանրամասն խոսելը նպատակահարմար չէ:
«Ադրբեջանում սպասվող նախագահական ընտրությունների արդյունքներն ու դրանց հաջորդելիք իրադարձությունները հնարավորություն կտան ավելի ճշգրիտ միջնաժամկետ կանխատեսում անելու համար: Հայաստանի և Ադրբեջանի ղեկավարների հանդիպումը գուցե և այս տարի չկայանա»,- մեկնաբանեց Արման Մելիքյանը:
Հիշեցնենք, որ Մինսկի խմբի համանախագահները շաբաթ օրը Վիեննայում հրապարակած հայտարարությամբ ամփոփել էին Հայաստանի և Ադրբեջանի արտգործնախարարների հետ իրենց վերջին հանդիպումների արդյունքները: Միջնորդները նշել էին, որ հունիս և հուլիս ամիսներին իրենց անցկացրած մի շարք հանդիպումների նպատակն էր նպաստել Լեռնային Ղարաբաղի հակամարտության խաղաղ կարգավորմանն ուղղված գաղափարների մշակմանը: ԵԱՀԿ պաշտոնական կայքէջում տեղադրված հայտարարության համաձայն՝ համանախագահներն ու նախարարները շարունակել են քննարկումները խաղաղ գործընթացի էության վերաբերյալ՝ կենտրոնանալով կողմերի միջև լարվածությունը նվազեցնելու և այս տարի ավելի ուշ ամենաբարձր մակարդակներով հանդիպման համար պայմաններ ստեղծելու միջոցների վրա:
