Բնակչության առողջությանը նվիրված ՄԱԿ-ի հետազոտությունը հանգեցրել է անսպասելի արդյունքների: Պարզվել է, որ Եվրամիությունում ավելորդ քաշ ունեցողների թվաքանակով առաջին տեղում Չեխիան է: Այնտեղ ավելորդ քաշի խնդիր ունի մեծահասակների մոտ 29 տոկոսը: Այս մասին հայտնում է ITAR-TASS-ը:
Իրավիճակը տխուր է նաև երեխաների ու դեռահասների շրջանում: Հետազոտությունն ավելորդ քաշ է ի հայտ բերել յուրաքանչյուր 5-րդի մոտ: Պարզվել է նաև, որ 1995 թվականին երկրում գեր երեխաների թիվը քառակի քիչ է եղել:
Դեռևս 10 տարի առաջ գիտնականները Չեխիայի բնակչության մոտ ավելորդ քաշի խնդիրը բացատրել են սիրելի ազգային ըմպելիքի՝ գարեջրի նկատմամբ նրանց սիրով: Գարեջրի կանոնավոր օգտագործումից էլ առաջանում են գարեջրային «փորիկները»: Վիճակագրությունը փաստւմ է, որ մեծահասակները սկսել են գարեջուր քիչ խմել, իսկ երիտասարդները մեծ սեր են դրսևորում գազավորված քաղցր ըմպելիքների հանդեպ:
ԵՄ-ում գեր բնակչության ցուցանիշով երկրորդ տեղում Սլովենիան է, երրորդում՝ Մալթան: Ամենանիհարները շվեյցարացիներն ու ֆրանսիացիներն են:
