Այդ ի՞նչ իրավական տերմին է՝ «օտարերկրացի վարորդ». «Էխո Մոսկվիի» անդրադարձը Նոր Մոսկվայի ավտովթարին

Հուլիսի 13-ին Պոդոլսկի մարզում տեղի ունեցած վթարին և մամուլում դրա արձագանքներին անդրադարձել է «Էխո Մոսկվի» ռադիոկայանի սյունյակագիր Արկադի Բաբչենկոն: Հիշեցնենք, վթարի հետևանքով զոհվել  է 18 մարդ: Վթարի մեջ մեղադրվում է Հայաստանի Հանրապետության 46-ամյա քաղաքացի Հրաչյա Հարությունյանը, որին երեկ հետաքննության պահանջով բժիշկները դեղամիջոցների միջոցով հանել են քնից և դատարան տարել չսափրված, կանացի գույնզգույն խալաթով:

 Նոր Մոսկվայի տարածքում ավտոբուսի վթարի հետ կապված՝ Սաբյանինը կոչ է արել խստացնել օտարերկրացի վարորդների պատասխանատվությունը, գրում է Բաբչենկոն:

Ես գաղափար չունեմ՝ այդ ինչ իրավական տերմին է՝ «օտարերկրացի վարորդ», սակայն ես պարոն քաղաքապետին կցանկանայի հարցնել՝ իսկ ո՞վ է վարձել այդ «օտարերկրացի վարորդին», նստեցրել նրան արգելակները չաշխատող բեռնատարի ղեկին: Ո՞վ է արտոնագրել այդ ընկերությունը, որն աշխատանքի է ընդունել օտարերկրացի աշխատողի: Ո՞վ է թողել, որպեսզի առանց համարանիշների մեքենան դուրս գա մայրուղի: Միգուցե «խաչե՞րը» Պուգաչովից:

Բացում ենք «Ինտերֆաքս»-ը և կարդում. «Տվյալ տրանսպորտային միջոցը հավաքված է եղել «տնային» պայմաններում՝ 3 տարբեր մեքենաներից, այն արգելված է եղել շահագործել, սակայն սեփականատեր ընկերությունը Հարությունյանին կարգադրել է խճաքարը տեղափոխել հենց այդ մեքենայով: Իսկ վարորդի պարտականությունների մեջ չէր մտնում հետևել մեքենայի տեխնիկական վիճակին, դրանով պետք է զբաղվեր ընկերության ղեկավարությունը,- պաշտպանության տեսակետն արտահայտել է փաստաբան Չաբանովը: Ինքը՝ Հարությունյանը, հստակ չի կարող ասել՝ ինչ ընկերությունում է աշխատել, սակայն առանց դրա  էլ այստեղ մի շարք հարցեր են առաջանում. ու՞մ է պատկանել այդ մեքենան, որը, ինչպես պարզվել է, գրանցված չէ եղել ճանապարհային ոստիկանության անվտանգության բաժնում և դուրս է եղել հաշվառումից, կամ ի՞նչ հիմունքով է այն շահագործվել»:

Ոչ: Պարզվում է՝ նրանք չեն: Միշտ չէ, որ ամեն ինչում մեղավոր են «ազգությամբ կովկասցիները»:

Այդ դեպքում՝ ո՞վ: Քննությունը չի կարողանում պարզել: Փնտրում են հրշեջները, փնտրում է ոստիկանությունը:

Վիզս կտրեմ՝ ընկերությունը, որն արդեն մեկ շաբաթ է չեն կարողանում գտնել քննիչները, պատկանում է Մոսկվայի շրջանի ինչ-որ տրանսպորտային բաժնի ինչ-որ պետի կնոջ եղբոր քրոջ ինչ–որ փեսայի, շարունակում է Բաբչենկոն: Սակայն 18 մարդու սպանության համար կնստեն ոչ թե նրանք, այլ ռուսերեն չխոսող գաստերբայտերը: Որին լուրերում անվանում են ոչ այլ ինչ, քան «հայ վարորդ»:

Հայ-վարորդներ… Հայ-վնասակարներ… Բժիշկ-մարդասպաններ… Անտոհմ կոսմոպոլիտներ… Ինչպե՜ս է այս ամենը հիշեցնում ոչ վաղ անցյալը:

Իսկ յակուտ քաղաքապետը, ընդ որում, գաստերբայտեր, կարգադրել է լուսացույց տեղադրել վթարի վայրում: Ինչն այնտեղ ընդհանրապես պետք չէ: Միայն խցանումներ կառաջացնի:

Բայց լուսացույց կտեղադրեն (ժամեր առաջ լուսացույցն արդեն տեղադրվել է-1in.am): Ինչ-որ նշան կկախեն: Արագությունը կսահմանափակեն, վարորդին կնստեցնեն, կիլոմետրանոց խցանումներ կառաջացնեն: Դրանով էլ ամեն ինչ կավարտվի:

Իսկ հազարավոր ընկերություններ ու չինովնիկներ, որոնք երեք «Կամազ»-ներից հավաքում են մեկը՝ առանց արգելակների, ղեկին նստեցնում առանց վարորդական իրավունքի գաստերբայտերների, ժամկետն անցած համարանիշներով, արտոնագրում են 15 աստիճան կողային տեքություն ունեցող «Բուլղարիա» շոգենավեր, և այլն, և այլն, այդպես էլ չեն գտնի:

Այս երկիրը կյանքի համար գնալով չափազանց վտանգավոր է դառնում:

Եվ գնալով ամեն ինչ ավելի է վատանում:

 

Պատրաստեց Վիկտորյա Անդրեասյանը