Այսօր՝ օգոստոսի 29-ին, Կենտրոնական ընտրական հանձնաժողովը հրավիրված արտահերթ նիստում չեղյալ է համարել 2016թ. հունիսի 30-ին ԱԺ-ի կողմից ընդունված ԸՕ-ի հայտնի փոփոխությունների օրինագիծը: Ի՞նչ ազդանշան է սա. արդյո՞ք փոփոխությունների ակնկալիքները հօդս են ցնդում. «Առաջին լրատվական»- ի հետ զրույցում անդրադառնալով այս հարցին՝ «Համագործակցություն հանուն ժողովրդավարության» ՀԿ նախագահ Ստեփան Դանիելյանը, ով 4+4+4 ձևաչափով քննարկումների մասնակից է, պատասխանեց, որ այդ որոշումը սպասելի էր:
Նրա խոսքով՝ դժվարությամբ և մեծ ճնշումներով է իշխանությունը գնացել ԸՕ փոփոխությունների համաձայնությանը. «Իրենց հաշվարկով փոփոխությունների համար անհրաժեշտ գումարները չէին ճարվելու, այդ հույսն ունեին, բայց ավելի շատ գումար ճարվեց, քան անհրաժեշտ էր, և նրանք խնդրի առաջ կանգնեցին»:
Ստեփան Դանիելյանի կարծիքով՝ քննարկումներ են եղել այն հարցի շուրջ, թե արդյոք այս պայմաններում այդ համաձայնության շրջանակներում կարող են ընտրությունների ժամանակ ապահովել այն թիվը, որն իրենց պետք է, տեսել են, որ ռիսկեր կան, և նոր պատճառաբանություն է առաջ եկել, որ լեհական ընկերությունը, որը ստանձնել էր համագործակցել և պատրաստել նույնականացման քարտերը, չի կարողանում իրականացնել այդ աշխատանքները: Պարզվում է՝ լեհական ընկերությունը ԵՄ Հայաստանի պատվիրակությանը տեղեկացրել է, որ Հայաստանից նման պատվեր չեն ստացել, ավելին՝ նրանց ներկայացուցիչները եկել են Հայաստան, և ՀՀ կառավարությունից նրանց հետ չեն հանդիպել, որովհետև, ըստ իրենց հայտարարության, արձակուրդում են եղել:
«Մենք այսօր ունենք քվազի ընդդիմություն, և ինձ համար անհասկանալի է, թե ինչու Սերժ Սարգսյանը չի գնում արդար ընտրությունների՝ այս պայմաններում: Գիտենք, որ նախորդ ընտրությունների ժամանակ հայտնի ընդդիմադիր կուսակցությունների ցուցակները ստորագրվում էին Բաղրամյան 26-ում Սերժ Սարգսյանի կողմից: Ըստ էության՝ այդ ցուցակները կոմպրոմիսի արդյունք էին, և այդ ընդդիմադիր կուսակցությունների 30 կամ ավելի տոկոսը Ս. Սարգսյանինն էին: Այսօր, կարծում եմ, այդ տոկոսներն ավելի շատ են, և ըստ էության, Ս. Սարգսյանը որևէ խնդիր չունի արդար ընտրություններ անցկացնելու և կայուն մեծմասնության կոալիցիան ձևավորելու»,- ընդգծեց Ս. Դանիելյանը:
Նրա կարծիքով՝ բոյկոտը միակ ելքն է, և իշխանության թույլ կետը հենց ընտրությունների օրն է: Ըստ Ս. Դանիելյանի՝ եթե հասարակությունը այդ օրը ցույց տա իր վերաբերմունքը, իշխանությունը լուրջ խնդիր կունենա:
Մանրամասները՝ տեսանյութում:
