Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում Աննա Մաթևոսյանի նախագահությամբ նորից սկսվեց Արման Կարապետյանի գործի դատական քննությունը:
Այս գործով արդեն երրորդ դատավորն է նշանակված: Գործը ի սկզբանե՝ 2015 թվականի դեկտեմբերի 29-ին, մակագրվել էր Արաբկիր և Քանաքեռ-Զեյթուն վարչական շրջանների դատավոր Արմեն Խաչատրյանին:
Այնուհետև ՀՀ նախագահի հրամանագրով կատարվել էին դատավորների փոխատեղումներ, Արմեն Խաչատրյանը դատավոր էր նշանակվել Աջափնյակ և Դավթաշեն վարչական շրջանների դատարանում:
2016 թվականի հունվարի 22-ին այս գործը մակագրվել էր դատավոր Ռուբիկ Մխիթարյանին, ում նախագահությամբ կայացել են մի քանի դատական նիստեր:
Սակայն Ռուբիկ Մխիթարյանն էլ նշանակվել է վերաքննիչ քրեական դատարանի դատավոր, ու այս «փոխանցումային» գործը 2016 թվականի հունիսի 24-ին մակագրվել է դատավոր Աննա Մաթևոսյանին:
Այն բոլոր դատաքննական փուլերը՝ հարցաքննություններ և այլն, որ իրականացրել էր դատավոր Ռ. Մխիթարյանը, արդեն «ուժի մեջ չեն»:
Նոր նախագահողը վերստին «զրոյից» սկսեց գործի դատական քննությունը:
Մի շարք նախապատրաստական գործողություններ կատարելուց հետո մեղադրող դատախազը նորից ընթերցեց մեղադրական եզրակացության եզրափակիչ մասը:
28-ամյա Արմանին մեղադրանք է առաջադրվել իր տատիկի նկատմամբ ավազակությամբ զուգորդված սպանության փորձ կատարելու համար՝ ՀՀ քրեական օրենսգրքի 34-104 հոդվածի 2-րդ մասի 8-րդ կետով:
Ըստ առաջադրված մեղադրանքի՝ 2015 թվականի նոյեմբերի 4-ին, ժամը 18-ի սահմաններում Արմանը գնացել է իր տատիկի՝ Սիրանուշի տուն:
«Տատին կյանքից զրկելու դիտավորությամբ Արման Կարապետյանը առաջին հարկի ննջասենյակում հարձակվել է մահճակալին պառկած տատի վրա, ջրով լի ապակե շշով հարվածել է տատիկի գլխին, ինչի հետևանքով վերջինս սկսել է խռխռալ: Տեսնելով, որ տատը չի մահացել, ջրով լի ապակե մեկ այլ տարայով Արման Կարապետյանը մեկ անգամ ևս հարվածել է տատիկի գլխի ձախ գագաթային շրջանին՝ պատճառելով գլխի սալջարդ վերք, գլխի մաշկի տակ՝ արյունահավաք: Տատիկը կորցրել է գիտակցությունն ու անշարժացել է: Կարծելով, թե տատիկը մահացել է, Արման Կարապետյանը հափշտակել է տուժողի 14 հազար դրամ արժողությամբ ոսկե ականջօղերը, 50 հազար դրամ գումարը, ինչպես նաև 20 եվրոն ու հեռացել է»:
Համաձայն մեղադրական եզրակացության՝ Արման Կարապետյանն իր հանցավոր մտադրությունը՝ տատիկի սպանությունը, ավարտին չի հասցրել իր կամքից անկախ հանգամանքներով՝ տատիկը վերջին շնչում էլ «լավություն է արել թոռնիկին» ու մահացել է սրտային սուր անբավարարությունից: Եվ Արման Կարապետյանին մեղադրանք է առաջադրվել ոչ թե ավազակությամբ զուգորդված սպանության, այլ՝ սպանության փորձի համար:
ԱրմանԿարապետյանը հայտարարեց, որ իրեն մեղավոր չի ճանաչում, իսկ առաջադրված մեղադրանքը «սուտ է»:
Դեռ նախորդ դատավորի կատարած քննության ժամանակ Արմանը ներկայացնում էր «ալիբի», համաձայն որի՝ նա սպանության փորձի ժամանակ գտնվել է ոչ թե տատիկի տանը՝ Կամարակի նրբանցքում, այլ՝ «Նաբերեժնիում»: Արման Կարապետյանը տաքսի է վարել:
Տատիկի տանը հայտնաբերվել է երկտող՝ Արմանի հասցեին հայհոյանքներով ու սպառնալիքներով լեցուն, սակայն դատաձեռագրաբանական փորձաքննության եզրակացությամբ՝ երկտողը գրվել է հենց Արմանի ձեռքով…
Արմանն ամուսնացած է եղել, ունի մեկ երեխա:
Արմանի մայրը մեր զրույցում ասաց, թե Արմանի կինը հեռացել է նրանից, նույնիսկ՝ ամուսնալուծվել է կալանքի տակ գտնվող ամուսնուց, երեխային էլ տարել է հետը, ինքը թոռնիկին չի հանդիպում:
Արմանի կինը կամ նախկին կինը այս գործով վկայի կարգավիճակ ունի:
Վկայի կարգավիճակ ունեն նաև տուժող տատիկի երկու դուստրերը, ովքեր ներկայացել էին դատարան, բայց վկաների հարցաքննությանն անցնել դատարանը այս նիստում չհասցրեց:
Ըստ ապացույցների հետազոտման սահմանված կարգի՝ կհարցաքննվեն տուժողի իրավահաջորդը, ով նույնպես տուժած տատիկի դուստրն է, ապա կհարցաքննվեն վկաները, կհետազոտվեն գործում առկա ապացույցներն ու փաստաթղթերը, ապա կհարցաքննվի մեղքը չընդունող ամբաստանյալը:
Ըստ ամբաստանյալի մայրիկի՝ տուժած տատիկը շատ է սիրել իր թոռանը՝ Արմանին, աջակցել է նրա երիտասարդ ընտանիքին:
Ամբաստանյալի մայրը հայտնեց նաև, որ վաճառել է Գեղարքունիքի մարզում գտնվող իրենց տունը, ներկայումս վարձակալությամբ բնակվում է Էջմիածնում, բայց իր կարծիքով՝ ինքը մաս ունի տատիկի երևանյան տանից, որտեղ տարիներ շարունակ ապրել է՝ տատիկի որդու հետ ամուսնանալուց հետո: Այդ տան հետ կապված, ըստ ամբաստանյալի մայրիկի, Արաբկիր և Քանաքեռ-Զեյթուն վարչական շրջանների դատարանում քաղաքացիական գործ է քննվում, բայց ինքը չգիտի՝ ինչ պահանջով:
Ամբաստանյալ Արման Կարապետյանը ու նրա շահերի պաշտպան, հանրային պաշտպանի գրասենյակի փաստաբան Լյուդվիգ Ավետիսյանը հայտարարեցին, որ ամբաստանյալն ունի առողջական խնդիրներ, իրենք դիմել են առողջապահության նախարարություն՝ ամբաստանյալի առողջական վիճակի խորացված մասնագիտական հետազոտությունը քաղաքացիական բուժհիմնարկում կազմակերպելու խնդրանքով:
Հաջորդ դատական նիստին՝ սեպտեմբերի 1-ին, դատարանը կհարցաքննի տուժողի իրավահաջորդին ու վկաների:
