Թուրքական Yeni Çağ թերթի փոխանցմամբ՝ հուլիսի 15-ին Թուրքիայի զինված ուժերը ենթարկվեցին այնպիսի ուխտադրուժ դավաճանության, որպիսին չի տեսել աշխարհի որևէ բանակ:
Թերթի հոդվածագիր Օրհան Ուղուրօղլուն գրում է. «Մեր թշնամիները ասացին, որ մեր բանակի ստացած վերքերը չի հաջողվի ամոքել բազում տարիներ, սակայն Թուրքիայի զինված ուժերն օգոստոսի 24-ին սկսեցին գրել նոր պատմություն»:
Խոսելով «Եփրատի վահան» գործողության մասին՝ հոդվածագիրը նշում է, որ 14 ժամում հաջողվեց ԴԱԻՇ-ին վտարել Ջերաբլուսից, որտեղ բարձրացվեց Սիրիական ազատ բանակի դրոշը:
Հոդվածագիրը ողջունում է, որ թուրքական բանակին այդ գործողությունը հաջողվել է իրականացնել առանց նյութական ու մարդկային կորուստների, սակայն դրա հետ մեկտեղ նա հարց է առաջ քաշում. «Թուրքական բանակը որքա՞ն երկար կմնա սիրիական տարածքում, այլ կերպ ասած՝ սիրիական ճահճուտում»:
Հոդվածագիրը վստահ է, որ Ջերաբլուսից փախուստի դիմած ԴԱԻՇ-ի զինյալները սպասում են հարմար պահի՝ թուրքական բանակի վրա հարձակվելու համար. «ԴԱԻՇ-ը հնարավորություններ չունի հաջողության հասնելու թուրքական բանակի հետ դիմակայությունում: Մինչդեռ Սիրիական ազատ բանակի զինյալները, որոնց ես տեսել եմ, ավելի շուտ հիշեցնում են զինված անձանց կույտ, քան բանակ:
Ցանկանում եմ ընդգծել, որ եթե Թուրքիան դուրս բերի իր զորքերը, իսկ ԴԱԻՇ-ը հարձակվի Ջերաբլուսի վրա, ապա կարծում եմ, որ Սիրիական ազատ բանակի զինյալները կնահանջեն առանց դիմադրության:
Թուրքական բանակն առանց դժվարության մաքրել է Ջերաբլուսն ու հարակից շրջանները: Սակայն այժմ այդ տարածաշրջանից դուրս գալն ավելի դժվար է, քան այնտեղ մտնելը:
Դրա համար էլ թուրքական բանակի հեռանալուց հետո ԴԱՒՇ-ը կփորձի նորից գրավել այդ շրջանը: Ժամանակն է, որ Թուրքիան ի կատար ածի անվտանգության գոտի ստեղծելու իր ծրագիրը: Բուֆերային գոտու անվտանգությունը պետք է ապահովեն ոչ թե թուրք զինծառայողները, այլ ՄԱԿ-ի կամ ՆԱՏՕ-ի զինծառայողները»:
