Չի բացառվում, որ նախագահների մակարդակով հանդիպումը ԼՂ խաղաղ կարգավորման բանակցություններին նոր թափ հաղորդի: Այս մասին «Առաջին լրատվական»-ի հետ զրույցում ասաց ԼՂՀ արտաքին քաղաքականության և անվտանգության հանրային խորհրդի նախագահ, քաղաքական փորձագետ Մասիս Մայիլյանը` անդրադառնալով Մինսկի խմբի համանախագահների՝ շաբաթ օրը Վիեննայում հրապարակած հայտարարությանը, որով համանախագահներն անդրադարձել էին կողմերի ամենաբարձր մակարդակով հանդիպման անհրաժեշտությանը:
Մասիս Մայիլյանը նշեց, որ ԵԱՀԿ Մինսկի խմբի համանախագահների տարածած հայտարարությունից կարելի է եզրակացնել, որ ԼՂ բանակցային գործընթացի կողմերի ամենաբարձր մակարդակներով հանդիպում հնարավոր է տեղի ունենա աշնանը Ադրբեջանում կայանալիք նախագահական ընտրություններից հետո՝ 2013թ. վերջին ամիսներին: Ըստ նրա՝ եթե համարենք, որ Ադրբեջանում կայանալիք նախագահական ընտրություններով բանակցային կողմեր հանդիսացող երեք երկրներում կավարտվի այն ընտրական փուլը, որը սկսվել է 2012թ. Հայաստանում տեղի ունեցած խորհրդարանական ընտրություններով, ապա չի բացառվում, որ առաջիկայում կողմերի համար Արցախյան կարգավորման բանակցային գործընթացը հայտնվի առաջին պլանում:
«Նախորդ երկու տարիների ընթացքում Արցախյան կարգավորման գործընթացը հայտնվել էր երկրորդական պլանում: Ներքին քաղաքական հարցերի լուծումից հետո, հնարավոր է, կարգավորման հարցերն ավելի հրատապ դառնան, ու միգուցե նախագահների մակարդակով հանդիպումը որոշակի նոր թափ հաղորդի բանակցային գործընթացին»,- ասաց Մասիս Մայիլյանը: Թեև, փորձագետի պնդմամբ, բանակցային գործընթացի հետագա ընթացքի ճակատագիրը միայն այդ հանդիպումից չէ, որ կախված է: Մասիս Մայիլյանի համոզմամբ՝ շատ ավելի կարևոր են բանակցային եռակողմ ձևաչափի վերականգնումը ու նոր մոտեցումների առկայությունը:
Հիշեցնենք, որ Մինսկի խմբի համանախագահները շաբաթ օրը Վիեննայում հրապարակած հայտարարությամբ ամփոփել էին Հայաստանի և Ադրբեջանի արտգործնախարարների հետ իրենց վերջին հանդիպումների արդյունքները: Միջնորդները նշել էին, որ հունիս և հուլիս ամիսներին իրենց անցկացրած մի շարք հանդիպումների նպատակն էր նպաստել Լեռնային Ղարաբաղի հակամարտության խաղաղ կարգավորմանն ուղղված գաղափարների մշակմանը: ԵԱՀԿ պաշտոնական կայքէջում տեղադրված հայտարարության համաձայն՝ համանախագահներն ու նախարարները շարունակել են քննարկումները խաղաղ գործընթացի էության վերաբերյալ՝ կենտրոնանալով կողմերի միջև լարվածությունը նվազեցնելու և այս տարի ավելի ուշ ամենաբարձր մակարդակներով հանդիպման պայմաններ ստեղծելու միջոցների վրա:
