«Մենք ինչ-որ շողուլից ընկել ենք, ես երբեք Երևանն այսպիսին չեմ հիշում»,- «Առաջին լրատվական»-ի հետ զրույցում ասաց ռեժիսոր Հրանտ Վարդանյանը՝ նկատի ունենալով նաև Երևանի կենտրոնում տարբեր վայրերից հնչող ռուսական ռաբիս երաժշտությունը:
Ռեժիսորի համոզմամբ՝ իհարկե, մենք անպայման դուրս կգանք այստեղից և կգանք ինքներս մեզ, «սակայն դրա համար անհրաժեշտ է տալ ճիշտ ինքնագնահատական, ուշադրություն դարձնել մշակույթին և պրոպագանդային, քանզի առաջ տանողը մշակույթն ու արվեստն է»:
Անդրադառնալով հատկապես հեռուստատեսությունում ռուսերենի մասսայականացման թեմային և, իհարկե, բացառելով Խորհրդային Միության վերականգնումը՝ Հրանտ Վարդանյանն ասաց. «Ճիշտն ասած, Ռուսաստանը զզվացրել է բոլոր առումներով. ես ազգին, մեկ մարդու նորմալ եմ վերաբերվում, իսկ այդ իմպերիան, պետությունը, կարծում եմ, գնում է դեպի մայրամուտ. ես դա նմանեցնում եմ լեշի, որն իր հետևից գարշահոտություն է արձակում, և ամբողջ աշխարհն է արդեն զզված»:
Մեր զրուցակցի խոսքով՝ այսօր մենք մեր զավակներին պարտավոր ենք տալ անգլերեն կրթության՝ հայերենից հետո, իհարկե, և ոչ թե նորից երեխաների վզին փաթաթենք ռուսերենը. «Իսկ էս ամբողջ պատմությունը՝ ԵԱՏՄ, բան… իմպերիայի շնչի վերջին թպրտոցն է, որին շատ ավանակներ հավատացին: Դա չաշխատող սիստեմ է»:
Ինչպես նկատեց մեր զրուցակիցը՝ մեր ժողովրդի պայքարը պետք է ուղղված լինի այդ գաղութացումից, իմպերիայից ազատմանը. «Մինչդեռ ժամանակին մեր այծ ղեկավարները ստրատեգիական շատ կետեր վաճառեցին ռուսներին: Լևոն Տեր-Պետրոսյանից սկսած մինչև հիմա մենք ձևականորեն ենք անկախ: Մենք դեռ պիտի անկախանանք, ու մեր առաջնահերթ պայքարը պետք է լինի հանուն դրա»:
Ուստի պետք է փոխել ոչ թե բարաքի պետին (երկրի նախագահին), այլ քանդել գաղութի պատերը և դուրս գալ՝ համոզված է մեր զրուցակիցը. «Մեր պետության կայացման երազը չի իրականանում, որովհետև հրամանատարը միշտ մնում է Կրեմլում»:
«Մեզ անընդհատ վախեցնում են, թե՝ եթե ռուսը չլինի, թուրքը մեզ կուտի, սակայն թուրքը դեռ իր կերածը չի կարողանում մարսել, թուրքին չեն թողնելու, որ ուտի, հակառակ դեպքում՝ վաղուց էր կերել, և ընդ որում՝ ռուսի հետ միասին էր կերել»,- վստահ է ռեժիսորը՝ նկատելով, որ Ռուսաստանի հետ մենք այլևս գնալու ճանապարհ չունենք, և ամոթ համարելով, որ «էն արև տղերքի մահվան գնով Ռուսաստանի նկատմամբ տրամադրություններ փոխվեցին»:
Ընդ որում, Հրանտ Վարդանյանը նաև Ռուսաստանին է մեղադրում այն հարցում, որ Սփյուռքը չի ինտեգրվում Հայաստանում, քանզի և Ռուսաստանը, և Թուրքիան, և Ադրբեջանը վախենում են մեր հավաքական ուժից:
Մեր զրուցակիցը այս ամենի ելքը տեսնում է՝ անդամակցություն Եվրոպական միությանը:
