Ոստիկանության Երևանի Շենգավիթի բաժանմունքի ավագ տեսուչ, ոստիկանության մայոր Բակուր Ավետիքյանը կալանավորվել է։
Նրան ՀՔԾ-ն մեղադրանք է առաջադրել ՀՀ քրեական օրենսգրքի 309-րդ և 311-րդ հոդվածներով՝ համապատասխանաբար Պաշտոնեական լիազորություններն անցնելը և Կաշառք ստանալը: Տեսուչը ձերբակալվել էր հուլիսի 11-ին և տվել խոստովանական ցուցմունքներ։
«Փաստինֆո»-ի ունեցած տեղեկություններով, ոստիկանության մայորը սեփականատեր քաղաքացուց պահանջել է դադարեցնել սեփական հողամասի թիթեղով ծածկված ցանկապատը քարե պատով փոխարինելու շինարարությունը՝ պատճառաբանելով, որ նա չունի շինթույլտվություն, ապա՝ նախազգուշացրել, որ վարչական իրավախախտման ակտ կգրի և կտուգանի 400.000 դրամով։
Վարչական պատասխանատվության չենթարկելու համար հողամասի սեփականատիրոջ հարևանը հյուրասիրություն է կազմակերպել և «պատիվ տվել» տեսուչ Ավետիքյանին, հյուրասիրությունից հետո նույն օրը՝ երեկոյան, մայորն իր աշխատասենյակում նաև գումար է պահանջել՝ վարչական իրավախախտումը չարձանագրելու համար։ Արդյունքում առաջացել է վիճաբանություն, որը վերածվել է քաշքշուկի և հենց ոստիկանության բաժնում տեսուչը, ըստ մեղադրանքի, ծեծի է ենթարկել այն մարդուն, ում հյուրասիրությունից ժամեր առաջ օգտվում էր գարեջրատանը։
