ԱՄՆ նախագահի հանրապետական թեկնածու Դոնալդ Թրամփն իր ընտրարշավը կառուցել է նախապաշարմունքների և խելացնորության վրա: Այսպիսի պնդմամբ է հինգշաբթի հանդես եկել նրա մրցակից Հիլարի Քլինթոնը Նևադա նահանգում իր կողմնակիցների առաջ ելույթի ժամանակ՝ հայտնում է The Guardian-ը:
«Դոնալդ Թրամփն իր ընտրարշավը կառուցել է նախապաշարմունքների և խելացնորության վրա: Նա օգտվում է ատելություն քարոզող խմբավորումների միտումներից,- ասել է նա:- Նա արմատական թևին օգնում է առաջատար դառնալ Հանրապետական կուսակցությունում: Լուրջ վտանգ է ներկայացնում նրա կողմից արժեքների անտեսումը, որոնք մեր երկիրը դարձնում են մեծ»:
Քլինթոնի խոսքով՝ Թրամփը բազմիցս նկատվել է՝ կապված ռասայական նշաններով խտրականության հետ, նաև տարածել է բուլվարային մամուլին արժանի «դավադրության վատ տեսություններ»: «Նա ուժեղացնում է կործանարար կարծրատիպերը և հետևում քողարկված ռասիստական բովանդակությամբ քաղաքականության,- կարծում է Քլինթոնը:- Թրամփին չի կարելի թույլ տալ ղեկավարել մեր կառավարությունը կամ հրամայել մեր զինծառայողներին»:
