Իսրայելի վարչապետ Բենիամին Նեթանյահուն ԱՄՆ հեռուստաալիքներից մեկի հետ ունեցած հարցազրույցում չի բացառել, որ իր երկիրը կարող է ստիպված լինել ինքնուրույն քայլեր ձեռնարկել՝ Իրանին միջուկային զենք ստանալ թույլ չտալու համար, հաղորդում է Ria Novosti-ն:
Նա զգուշացրել է, որ Իրանի նոր նախագահ Հասան Ռուհանին չի հրաժարվի ատոմային ծրագրից, և համաշխարհային հանրությանն Իրանի դեմ պատժամիջոցների խստացման կոչ է արել:
«Մեր ժամերը տարբեր արագությամբ են ընթանում: Մենք Իրանին ավելի մոտ ենք, քան ԱՄՆ-ը, և ավելի խոցելի ենք: Ուստի մենք պետք է լուծենք Իրանին կանգնեցնելու խնդիրը և հնարավոր է՝ ավելի վաղ, քան դրանով կզբաղվի ԱՄՆ-ը: Որպես Իսրայելի վարչապետ՝ ես պատրաստ եմ ամեն ինչ անել իմ երկիրը պաշտպանելու մի ռեժիմից, որը սպառնում է նրա գոյությանը»,- ասել է Նեթանյահուն:
Այն հարցին, թե երբ կընդունվի Իրանի վրա հարձակում գործելու կամ չգործելու որոշումը, նա պատասխանել է. «Ես չեմ սպասի այնքան ժամանակ, մինչև շատ ուշ լինի»:
«Ռումբի արտադրության մեջ ամենաբարդը տարրալուծվող միջուկային նյութեր պատրաստելն է: Դա խնդրի 90 տոկոսն է: Այժմ նրանք 250 կգ ուրանից ունեն 190-ը, իսկ 6-7 ամիս առաջ ունեին 111-ը: Նրանք կարմիր գծին են մոտենում, բայց այն դեռ չեն հատել»,- հավելել է նա:
