Մայիսի 17-ին ՀՀ արտաքին գործերի նախարարի տեղակալ Արման Կիրակոսյանն ընդունեց ՄԱԿ-ի Փախստականների հարցերով գերագույն հանձնակատար Անտոնիո Գուտերեշին (Antonio Guterres), որը Հայաստան է ժամանել ՀՀ կառավարության հրավերով` մասնակցելու 2011 թվականի մայիսի 17-ին Երևանում կայանալիք դոնորների միջազգային համաժողովի աշխատանքներին:
Ողջունելով պարոն Գուտերեշին՝ ՀՀ փոխարտգործնախարարը նախ շնորհակալություն հայտնեց Գերագույն հանձնակատարին հրավերն ընդունելու և համաժողովին իր մասնակցությունը բերելու համար, ապա իր գոհունակությունն արտահայտեց ՄԱԿ-ի Փախստականների հարցերով Գերագույն հանձնակատարի գրասենյակի հետ անցած տարիների ընթացքում ծավալած արդյունավետ համագործակցության համար:
Գերագույն հանձնակատարը նշեց, որ Հայաստանը, լինելով ՄԱԿ-ի փախստականների կարգավիճակի և անքաղաքացիության կրճատման մասին կոնվենցիաների անդամ, պետք է հետագայում ևս շարունակի ապահովել նշված փաստաթղթերի դրույթների իրականացումը: Այս առումով նա կարևորեց այս տարվա վերջում ՄԱԿ-ի կողմից Ժնևում կազմակերպվելիք նախարարական համաժողովը, որը նվիրված կլինի նշված կոնվենցիաների հոբելյաններին և հնարավորություն կընձեռի անդամ պետություններին` ամփոփելով այս ոլորտում կատարված աշխատանքները, ձեռնարկել նոր քայլեր: Հանձնակատարը նշեց, որ Հայաստանը` լինելով եվրոպական արժեքներ կրող երկիր, առաջնորդվում է այս չափանիշներով նաև իր երկրի ապաստանի համակարգի կատարելագործման հարցում:
Այնուհետև պարոն Կիրակոսյանը հակիրճ ներկայացրեց իրավիճակը տարածաշրջանում, մասնավորապես անդրադառնալով հարևան երկրների հետ Հայաստանի հարաբերություններին:
Զրույցի ավարտին պարոն Գուտերեշն անդրադարձավ ՄԱԿ-ի Փախստականների հարցերով գրասենյակի ուշադրության կենտրոնում գտնվող` աշխարհի մի շարք թեժ կետերի խնդիրներին:
