Բրիտանիայում կայացել է թագավորական զորքի շարքային Լի Ռիգբիի թաղման արարողությունը, ով մայիսին դարձել էր երկու իսլամիստների՝ Մայքլ Ադեբոլաջոյի և Մայքլ Ադեբովալեյի հարձակման զոհը: Հրաժեշտի արարողությունը, որին մի քանի հազար մարդ է մասնակցել, կայացել է Բերի եկեղեցում:
Թաղման արարողությանը մասնակցել են նաև Բրիտանիայի վարչապետ Դևիդ Քեմերոնը և Լոնդոնի քաղաքապետ Բորիս Ջոնսոնը: Արարողությանը ներկա է եղել նաև սպանվածի երկու տարեկան որդին, ում վերնաշապիկի վրա գրված է եղել «Իմ հայրիկը իմ հերոսն է»:
Մայիսի 22-ին Վալիչ թաղամասում երկու զինված իսլամիստներ հարձակվել էին 25-ամյա զինվորի վրա: Մինչ իրավապահները կժամանեին դեպքի վայր, զինծառայողը արդեն մահացած էր: Իսլամիստները հարձակվել էին իրավապահների վրա, և վերջիններս ստիպված էին եղել կրակ բացել, ինչի հետևանքով երկու հանցագործներն էլ վիրավորվել էին և հիվանդանոց տեղափոխվել:
Ներկա պահին մեղադրյալները պահվում են Լոնդոնի Բելմարշ բանտում և դատական նիստին մասնակցել են վիդեոկապի համակարգի միջոցով: Նախնական դատալսումների ժամանակ նրանք պատասխանել են միայն իրենց անունների հետ կապված հարցին: Դրանից հետո դատարանը որոշում է կայացրել այս գործով առաջին նիստն անցկացնել ընթացիկ տարվա նոյեմբերի 18-ին: Իսլամիստները մեղադրվում են սպանության, երկու ոստիկանների նկատմամբ մահափորձի և զենք պահելու մեջ: Մեղադրանքի հաստատվելու դեպքում նրանց ցմահ ազատազրկում է սպառնում:
