Կառավարության պահուստային ֆոնդից 17 միլիոն 540 հազար դրամ է հատկացվել քաղաքաշինության նախարարությանը, Աբովյան քաղաքում գտնվող Հայ և ռուս ժողովուրդների բարեկամության թանգարանի մասնաշենքը վերանորոգելու նպատակով։ Թե ինչու է կառավարությունը բազմաթիվ խնդիրներ թողած առաջնահերթությունը տվել հենց Հայ և ռուս ժողովուրդների բարեկամության թանգարանի նորոգմանը, պարզ չէ։ Թանգարանի տնօրեն Աշոտ Ջիվանյանն ինքը «Առաջին լրատվական»-ի հետ զրույցում ասաց, որ նորոգման նախաձեռնությունը պատկանում է կառավարությանը։ «Թանգարանում կան հայ ստեղծագործողների նկարներ, մեր հայ նկարիչների նկարներ, որոնք ուսանել ու ստեղծագործել են Ռուսաստանում։ Կան ռուս ստեղծագործողների գործեր։ Ունենք փաստաթղթեր և այլ նմուշներ»,- մեզ հետ զրույցում ներկայացրեց թանգարանի տնօրենը՝ նշելով, թե ինչ նմուշներ են պահվում և որքանով էր անհրաժեշտ նորոգել թանգարանը։ Տնօրենի խոսքերով՝ անհրաժեշտ է, որպեսզի օդափոխման և հովացման համակարգեր տեղադրվեն, որպեսզի նմուշները պահպանվեն։ Բացի այդ, տանիքը պետք է նորոգվի, քանի որ անձրևների ժամանակ կաթոցներ են լինում և դրանց հետևանքով անգամ մի պատ է քանդվել։
Աշոտ Ջիվանյանի խոսքերով՝ իրենք պայմանավորվածություն ունեն Դոնի Ռոստովի հայ և ռուս ժողովուրդների բարեկամության թանգարանի տնօրինության հետ, որտեղից խոստացել են օժանդակել, որպեսզի թանգարանի բյուջեն համալրվի։
Առավել մանրամասն՝ տեսանյութում:
Լուսանկարը՝ armtimes.com-ի
