Հուլիսի 12-ին Մայր Աթոռ Սուրբ Էջմիածնում Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսն ընդունել է մի խումբ ավստրիացի կաթոլիկ ուխտավորների` առաջնորդությամբ Ավստրիայի Կաթոլիկ Եկեղեցու Գուրկի թեմի առաջնորդ եպիսկոպոս Ալոյս Շվարցի:
Ողջունելով ուխտավորների այցը Հայաստան և Մայր Աթոռ Ս. Էջմիածին` Վեհափառ Հայրապետը նշել է, որ նման այցելությունները նպաստում են ոչ միայն փոխճանաչողությանը, այլև երկու ժողովուրդների հարաբերությունների սերտացմանն ու մշակույթների հարստացմանը: Նորին Սրբությունն իր խոսքում կարևորել է ուխտագնացությունների դերը քրիստոնյայի կյանքում` ընդգծելով, որ դրանք առիթ են ստեղծում միասնաբար աղոթք բարձրացնելու առ Աստված` ժողովուրդների բարօրության, աշխարհի խաղաղության և Քրիստոսի Եկեղեցու առաքելության արդյունավորման համար:
Անդրադառնալով Հայաստանյայց Առաքելական և Հռոմի Կաթոլիկ Եկեղեցիների սերտ հարաբերություններին` Ամենայն Հայոց Կաթողիկոսը մասնավորապես իր շնորհակալությունն է հայտնել Ավստրիայի կաթոլիկ կարդինալ Շոնբոռնին այն աջակցության համար, որի շնորհիվ Հայ Եկեղեցու հոգևոր սպասավորները հնարավորություն են ստանում իրենց ուսումը շարունակելու Ավստրիայի բարձրագույն ուսումնական հաստատություններում:
Վեհափառ Հայրապետը պատասխանել է նաև ուխտավորների հարցերին, որոնք վերաբերում էին Հայ Եկեղեցու պատմությանը, հասարակական կյանքում Եկեղեցու դերակատարությանը և Մայր Աթոռի հոգևոր-կրթական ծրագրերին ու գործունեությանը:
Հանդիպմանը ներկա է եղել նաև Ավստրիայի Հանրապետությունում Հայաստանի Հանրապետության արտակարգ և լիազոր դեսպան Արման Կիրակոսյանը:
