Եվրոպայում 2008 թվականին ֆինանսական ճգնաժամի հետևանքով ծնելիությունը ընկել է՝ ցույց են տալիս նոր հետազոտության արդյունքները:
Գերմանիայում ֆիզիկոս Մաքս Պլանկի անվան ժողովրդագրական հետազոտությունների ինստիտուտի գիտնականները պարզել են, որ եվրոպական 28 երկրում ծնելիությունն ընկել է՝ գործազրկության աճին զուգընթաց: Այս մասին հայտնում է BBC-ն:
Հատկապես դա վերաբերում է մինչև 25 տարեկան երիտասարդներին և Եվրոպայի հարավի բնակիչներին, օրինակ՝ Իսպանիային:
Տնտեսության վիճակի և ծնելիության միջև փոխադարձ կապը գիտնականների կողմից քննարկվում է արդեն վաղուց, սակայն այդ առնչությամբ միանշանակ եզրակացություններ չկան:
Գերմանացի հետազոտողների կարծիքով՝ իրենց աշխատանքը ցույց է տալիս, որ ժամանակակից եվրոպական երկրում գործազրկության մակարդակն իսկապես ազդում է ծնելիության վրա:
«Ֆինանսական ճգնաժամը Եվրոպա եկավ այն պահին, երբ ծնելիությունը շատ երկրներում սկսել էր բարձրանալ»,- ասում է ժողովրդագիր Միքայելա Քրեյենֆելդը:
Իսպանիայում մեկ կնոջը բաժին ընկնող ծնունդների թիվը 2008-2011 թվականներին ընկել է մոտ 8 տոկոսով, երբ երկրում գործազրկության մակարդակը բարձրացել է՝ 8.3-ից հասնելով 11.3 տոկոսի:
Ծնելիության անկում է նկատվել նաև Հունգարիայում, Իռլանդիայում, Խորվաթիայում և Լատվիայում: Ծնելիության մակարդակի դանդաղում է նկատվել Չեխիայում, Լեհաստանում և Մեծ Բրիտանիայում: Գերմանիաում և Շվեյցարիայում, որտեղ ճգնաժամը տարել են բավականին թեթև, նորածինների թվաքանակը չի փոխվել: