Ազատամարտիկ Կարեն Մելիքսեթյանը այսօր լրագրողների հետ հանդիպմանը խոսեց իրենց սկսած պայքարի մասին և նշեց, որ արդեն մեկ ամիս է անցել, սակայն դեռևս վարչապետից իրենց հարցերին ոչ մի պատասխան չեն ստացել. «Եթե մեր հարցը չլուծվի, ո՛չ զինվորի, ո՛չ հասարակության աչքին ազատամարտիկը արժեք չի դառնա: Կառավարությունում շատ հիմքեր կան՝ մեր հարցերին լուծում տալու համար, և թող չփորձեն տղաների գլուխը լցնել: Մենք այժմ պահանջատեր ենք, մենք հաղթել ենք պատերազմում, բայց մեր երկրում մեզ զգում ենք ստրուկ, պետության կողմից մատնված ենք անուշադրության»:
Նրա հավաստմամբ՝ երբ ազատամարտիկների մասին օրենք է ընդունվում, պիտի ընդունվի բոլոր ազատամարտիկների և զոհված ազատամարտիկների ընտանիքների համար, ոչ թե որոշակի մարդկանց կողմից պիտի սեփականացնել օրենքը` որոշակի շահերից ելնելով:
Պահեստազորի ավագ լեյտենանտ, երկրորդ խմբի հաշմանդամ Գեղամ Հակոբյանն էլ նշեց, որ թանկացնում են գազը, էլեկտրաէներգիան. ազատամարտիկներն իրենց ստացած կամ չստացած թոշակով ինչպե՞ս կարող են կոմունալ ծախսերը վճարել և ընտանիքը պահել. «Գնում ենք բժշկի, ասում են՝ պարտադիր պառկիր այս կամ այն հիվանդանոցում, բայց ինչո՞վ: Երբ ասում ենք պատերազմի մասնակից ենք և հաշմանդամ, ասում են՝ չգայիր… ցավալի շատ հարցեր կան, դրա համար էլ մենք բոլորս պահանջատեր ենք դարձել: Պետք է կարողանանք գոնե գոյատևել»:
«Առաջին լրատվական»-ի այն հարցին, թե ազատամարտիկների շարքերում շատ են չկռված տղաները, ի՞նչ պետք է անել նրանց շարքերը մաքրելու համար, ազատամարտիկ, պահեստազորի փոխգնդապետ Գևորգ Տեր-Գևորգյանը պատասխանեց, որ այդ տեսակը միշտ եղել և լինելու է. «Այժմ իրենց ազատամարտիկ են համարում այնպիսի մարդիկ, ովքեր այդ տարիներին ութ-ինը տարեկան են եղել, ինչ-ինչ ճանապարհներով հարստացել են և այժմ Խաչի ասպետ են: Դա գողություն է, գողանում են զոհված տղաների կենսագրությունը, մեր անցած ուղին»:
Նա նշեց, որ այսօր ողջ են հրամանատարները, որոնք կարող են հանել իրենց փաստաթղթերը և շատ հեշտ մաքրել շարքերը. «Նրանք եթե տեսնեն, որ պայքարը արդյունավետ է, պետք է օբյեկտիվ զտում անեն. խնդիրը լուծվող է»:
Նա հիշեց, որ երբ նոր էին վերադարձել պատերազմից, ծանոթ, բայց չկռված մարդիկ հավաքում էին ազատամարտիկներին, խմում-հարբում էին և խոսում պատերազմի այս կամ այն գործողությունից. «Դրանից հետո մենք լսում էինք, որ այդ նույն մարդիկ ինչ-որ տեղերում պատմում են այդ պատմությունները: Նրանք այդպես կռվողի անուն էին հանում, բայց դա ստորություն է»:
