Հուլիսի 14-ին գյուղապետի ընտրություններ տեղի կունենան ոչ միայն Կոտայքի մարզի Պռոշյան, այլև Շիրակի մարզի Հովիտ գյուղում:
Հովիտ գյուղում նոր արտահերթ ընտրություն անցկացնելու կարիք առաջացավ այն բանից հետո, երբ հանկարծամահ եղավ գյուղապետ Սամվել Պետրոսյանը:
Ինչպես «Առաջին լրատվական»-ի հետ զրույցում տեղեկացրեց Շիրակի մարզպետարանի աշխատակազմի տեղական ինքնակառավարման և հանրապետական գործադիր մարմինների հարցերով վարչության տեղական ինքնակառավարման և համայնքային ծառայությունների հարցերի բաժնի պետ Ռոբերտ Հարությունյանը, գյուղում առաջադրվել են երկու թեկնածուներ՝ Հանրապետական կուսակցության անդամ Ավետիք Սերոբյանը և անկուսակցական Ռազմիկ Հակոբյանը:
Ավետիք Սերոբյանը, ի դեպ, առաջադրվում է արդեն երկրորդ անգամ. նա նախկինում առաջադրվել և պարտվել էր հանկարծամահ եղած գյուղապետ Սամվել Պետրոսյանին, իսկ Ռազմիկ Հակոբյանը գյուղի անասնաբույժն է, այժմ՝ գյուղապետի ժամանակավոր պաշտոնակատարի տեղակալը:
Ավետիք Սերոբյանը գործարար է, նախկինում զբաղվել է դիզելային վառելիքի առքուվաճառքով, այժմ՝ գյուղատնտեսությամբ: Ի դեպ, Ռ․ Հարությունյանի խոսքով՝ նա այս ընտրություններին հաղթելու շատ ավելի մեծ շանս ունի, քան իր մրցակիցը:
Նշենք, որ Հովիտ գյուղում քվեարկելու իրավունք ունի 394 ընտրող:
