Barnes & Noble ընկերության գլխավոր գործադիր տնօրեն Ուիլյամ Լինչը հրաժարական է տվել:
Ինչպես հաղորդում է BBC News-ը, Լինչի հեռանալը տեղի է ունեցել մի քանի օր անց այն բանից, երբ Barnes & Noble-ում հայտարարել են պլանշետների և Nook ընթերցիչների վաճառքի նվազման մասին: 2012թ. ֆինանսական տարվա վերջին եռամսյակում Nook սարքերի վաճառքը կրճատվել է 34%-ով՝ նախորդ տարվա նույն ժամանակահատվածի համեմատ:
Barnes & Noble-ի համապատասխան ստորաբաժանման վնասը նույն ժամանակահատվածում աճել է ավելի քան երկու անգամ՝ մինչև 118.6 միլիոն դոլար: 2012թ. ֆինանսական տարվա ընթացքում Nook-ի կորուստներն ընդհանուր առմամբ կազմել են 475 միլիոն դոլար:
Barnes & Noble-ը կառավարում է ԱՄՆ-ում ավելի քան 600 գրախանութներ: Բացի այդ, ընկերության դուստր ձեռնարկությունը՝ Barnes & Noble College Booksellers-ը, միավորում է ավելի քան 680 ուսումնական գրականության խանութներ երկրի քոլեջներում և համալսարաններում:
