ՀՀ նախագահի նախկին թեկնածու, ԱԻՄ նախագահ Պարույր Հայրիկյանի մահափորձի գործով այսօրվա դատական նիստում տուժողը ճանաչվել է նաև քաղհայցվոր, իսկ ամբաստանյալներ, ՀՀ նախագահի նախկին թեկնածու Վարդան Սեդրակյանը, Խաչատուր Պողոսյանն ու Սամվել Հարությունյանը՝ քաղպատասխանողներ:
Պ.Հարիկյանն այսօր ներկայացրել է քաղհայց՝ 42 մլն. 524 հազար դրամի չափով ամբաստնյալներից գումար բռնագանձելու մասին: Ինչպես «Փաստինֆո»-ին հայտնել է Պ.Հայրիկյանը, հայցապահանջի գումարի չափը որոշվել է՝ հիմնվելով մահափորձի հետևանքով բուժման ծախսերի՝ ներառյալ վիրահատությունների, կառավարության հաշվարկի վրա:
Երևանի Կենտրոն և Նորք-Մարաշ վարչական շրջանների դատարանը՝ դատավոր Գագիկ Պողոսյանի նախագահությամբ, մերժեց 2013թ. հունվարի 31-ին, ժամը 23.20-ի սահմաններում տեղի ունեցած մահափորձի քննչական փորձարարություն նշանակելու մասին սպանության փորձը կատարելու մեջ մեղադրվող Խաչատուր Ավետիսյանի պաշտպան Լյուդվիգ Ավետիսյանի միջնորդությունը: Դատարանը գտավ, որ դեպքի մասին կան ապացույցներ, այդ թվում՝ տուժողի ու ամբաստանյալի նախաքննական ու դատաքննական ցուցմուքները, որոնց արժանահավատության վերաբերյալ դատարանը գնահատականներ կտա խորհրդակցական սենյակում:
Իսկ ամբաստանյալ Վ.Սեդրակյանից ամբաստանյալ Խ.Պողոսյանի կողմից գնված «Վոլվո» մակնիշի մեքենայի ապրանքագիտական փորձաքննություն նշանակելու մասին պաշտպանի միջնորդության վերաբերյալ որոշում կայացնելու համար դատարանը հեռացել է խորհրդակցական սենյակ: Պաշտպանական կողմը գտնում է, որ միջնորդությունը կարևոր է, որպեսզի որևէ կասկածներ չլինեն, թե մեքենան նախնական վարձատրություն է եղել՝ ապագային միտված: Ամբաստանյալ Վարդան Սեդրակյանն առարկել է միջնորդության դեմ՝ հայտարարելով, որ մեքենան վաճառվել է անցյալ տարվա հունիսին, երբ ոչ ինքը, ոչ Պ.Հայրիկյանը չէին առաջադրվել որպես ՀՀ նախագահի թեկնածուներ: Միջնորդության դեմ է առարկել նաև մեղադրող կողմը՝ մեքենայի հանգամանքը մեղադրանքի ծավալի մաս չի կազմում, իսկ դատարանը հորդորել է պաշտպանին ու իր պաշտպանյալին հայտնել, եթե իրենց հայտնի է ավելին, քան կա գործի նյութերում: Պաշտպան Լ.Ավետիսյանը, սակայն. Հավաստիացրել է, որ իրենց ավելին հայտնի չէ:
