Վրաստանի նախագահ Միխեիլ Սաակաշվիլին խոստովանել է, որ Ռուսաստանի ղեկավարությունը Վրաստանին որոշակի հարգանքով է վերաբերվել: Այս մասին հաղորդում է «Նովոստի Գրուզիա»-ն: Միևնույն ժամանակ նախագահն իր դժգոհությունն է հայտնել «Ռոսպոտրեբնադզոր»-ի ղեկավար Գենադի Օնիշչենկոյի՝ Վրաստանի հանդեպ ունեցած վերաբերմունքից, որի գերատեսչությունից են կախված վրացական գինու մատակարարումները ռուսական շուկա:
Սաակաշվիլին նշել է, որ նախկինում Վլադիմիր Պուտինը Վրաստանին ընդունել է որպես թշնամի, սակայն հարգանքով է վերաբերվել նրան: Պատճառն այն է եղել, որ «ժողովրդավարական աշխարհն անխոս աջակցել է Վրաստանին»: Նախագահի խոսքերով՝ «Միացյալ ազգային շարժման» կառավարման օրոք Վրաստանը ոչ մեկի առաջ գլուխ չի խոնարհել:
Նախագահը միևնույն ժամանակ նշել է, որ վերջին ժամանակներս Պուտինը Վրաստանի մասին չի խոսում: Սաակաշվիլիի խոսքերով՝ Վրաստանին կցել են Օնիշչենկոյին, ով «պարբերաբար հարվածում է վրացիների ծոծրակին»:
Չի հստակեցվում, թե Օնիշչենկոյի որ հայտարարություններն են առաջացրել Սաակաշվիլիի դժգոհությունը:
