Սերժ Սարգսյանը հանդիպել է Հանրային խորհրդի անդամների հետ և նրանց կոչ արել բոլոր հարցերում լինել հետևողական և որևէ որոշում կայացնելուց հետո իրենց գործը չհամարել ավարտված ու քաշվել մի կողմ: Սերժ Սարգսյանի այս հանդիպումն ու հորդորը շատ ուշագրավ է ՀՀԿ գործկոմի վերջին նիստի ֆոնին, որը կարելի է համարել հանգուցային ներիշխանական և ներքաղաքական իրավիճակի առումով: Նիստը տեղի ունեցավ հայտնի իրադարձություններից և հայտարարություններից հետո, սակայն սպավող պայթյունային որոշումները կամ արդյունքները չեղան, և ՀՀԿ-ականները հայտարարեցին, որ եկել են ընդհանուր հայտարարի: Այսինքն՝ ակնհայտ է, որ Սերժ Սարգսյանը ձեռնպահ էր մնացել ՀՀԿ գործկոմի նիստում գրոհի բարձր տեմպ պահելուց, իսկ, ավելի շուտ, հավանական է, որ նա պարզապես չէր ցանկացել դրա ռեսուրսը և ընդամենը իր բորբոքած կրակն էր հանդարտեցրել՝ հրդեհ չբռնկելու մտավախությամբ:
Ամենայն հավանականությամբ, գործկոմի նիստում բավական սուր են եղել տրամադրությունները, և հավանական է, որ Սերժ Սարգսյանը զգացել է ներիշխանական լուրջ դիմադրություն, ինչի արդյունքում էլ ձեռնպահ է մնացել հետագա կտրուկ որևէ գործողությունից: Եվ միգուցե նաև այս տրամաբանության շրջանակում է նա ՀՀԿ գործկոմի այդ հավաքից հետո հավաքում Հանրային խորհրդին, որի մասին Սերժ Սարգսյանը նույնիսկ կարծես մոռացել էր: Հատկապես ուշագրավ է ՀԽ-ին նրա ուղղած կոչը, որն, ըստ էության, ներքին և արտաքին հարցերում ավելի ագրեսիվ լինելու կոչ էր:
Սերժ Սարգսյանը ՀՀԿ գործկոմից հետո դիմում է ՀԽ-ին՝ Հանրապետականին ցույց տալու համար, որ ունի հակադիր ռեսուրս, որն անհրաժեշտության դեպքում կարող է բանեցնել ՀՀԿ-ում առկա «սեպարատ» տրամադրությունների դեմ: Այլ կերպ ասած, ի դեմս ՀԽ-ի՝ Սերժ Սարգսյանը ցուցադրում է իր զենքը ՀՀԿ-ի այն շրջանակների դեմ, որոնք դժգոհ են Սերժ Սարգսյանի քաղաքականությունից, Տիգրան Սարգսյանին պահելու և աջակցելու նրա որոշումներից, Հովիկ Աբրահամյանին առայժմ անուղղակի, սակայն թափանցիկ կերպով ուղղված նրա հարվածներից:
Ավելին՝ Սարգսյանը նաև կոչ է անում, որպեսզի այդ զենքը աշխատի և ըստ էության չժանգոտի, ինչը հիմք է տալիս ենթադրելու, որ չնայած ՀՀԿ գործկոմի, այսպես ասած, հարաբերական հետնիստային անդորրին, ներիշխանական հարաբերությունների պարզաբանումն առաջիկայում շարունակվելու է կամ վերսկսվելու է ավելի սուր կերպով, և Հանրային խորհրդին Սերժ Սարգսյանը պատրաստում է ներիշխանական մարտերի:
Լուսանկարը՝ Emedia.am-ի
