Չի բացառվում, որ Ասոցացման համաձայնագրի ճանապարհին Ռուսաստանը որոշակի խոչընդոտներ հարուցի Հայաստանի համար: «Առաջին լրատվական»-ի հետ զրույցում այս մասին ասաց Բրյուսելում գործող Եվրոպական քաղաքականության կենտրոնի փորձագետ Ամանդա Փոլը՝ խոսելով ՀՀ-ԵՄ Ասոցացման համաձայնագրի ստորագրման հնարավորությունների և հայ-թուրքական սահմանի հնարավոր բացման շուրջ:
Ամանդա Փոլը նախ նշեց, որ գրեթե անհնար է, որ Հայաստանն առաջիկայում՝ նոյեմբերին, Վիլնյուսում «Արևելյան գործընկերության» գագաթնաժողովին ստորագրի Ասոցացման համաձայնագիրը, որովհետև եթե նույնիսկ ԵՄ-ի հետ բանակցային գործընթացն ավարտված է, տեխնիկական գործընթացներն ավարտին հասցնելու, այդ թվում համաձայնագրի ողջ տեքստը պատրաստելու համար բավարար ժամանակ չի մնացել: Ըստ նրա՝ նույն իրավիճակում են Վրաստանն ու Մոլդովան: Ուստի, Փոլի համոզմամբ, նախընտրելի է, որ Հայաստանն ունենա նախնական համաձայնագիր Վիլնյուսում: «Միայն Ուկրաինան է, որ պատրաստ է ստորագրել համաձայնագիրը, քանի որ համաձայնագրի ողջ տեքստը գրվել էր դեռևս որոշ ժամանակ առաջ»,- նկատեց նա: Վերջինս նաև անդրադարձավ խոսակցություններին, թե Ասոցացման համաձայնագրի ստորագրման ճանապարհին որոշակի խոչընդոտներ միգուցե հարուցվեն, ասաց, որ չի կանխատեսում՝ ԵՄ-ի կողմից խոչընդոտներ կլինե՞ն, եթե բոլոր հիմնահարցերը համաձայնեցվեն:
«Այս հարցն ավելի խնդրահարույց է Ռուսաստանի պարագայում, քանի որ Ռուսաստանի ղեկավարությունն ավելի կնախընտրի, որ Հայաստանը միանա Մաքսային միությանը: Բնականաբար, անհնար է համատեղել ռուսական և եվրոպական տնտեսական ծրագրերը: Ուստի առաջիկա ամիսներին մենք Ռուսաստանի կողմից Հայաստանի նկատմամբ մեծացող ճնշման ականատեսը կլինենք, հնարավոր է օգտագործվի փափուկ ճնշում և այլ միջոցներ ՀՀ քաղաքականությունը փոխելու ուղղությամբ»,- տեսակետ հայտնեց փորձագետը:
Հարցին, թե Հայաստանի՝ Ասոցացման համաձայնագրի ստորագրման դեպքում հնարավո՞ր է ԵՄ-ն ճնշումներ գործադրի Թուրքիայի նկատմամբ՝ հայ-թուրքական սահմանի բացման ուղղությամբ, Ա. Փոլը պատասխանեց, որ Թուրքիա-ԵՄ հարաբերություններն այդքան էլ առողջ վիճակում չեն, շատ խնդիրներ են դեռևս առկա: Նրա դիտարկումներով՝ Հայաստանի կողմից Ասոցացման համաձայնագրի ստորագրումը չի կապվում հայ-թուրքական սահմանի բացման հետ: «Ներկայումս այդ հարցը ո՛չ Թուրքիայի, ո՛չ ԵՄ-ի առաջնությունը չէ: Մերձավոր Արևելքում տեղի ունեցող զարգացումներն ավելի ճնշող են, պահանջում են ԵՄ-Թուրքիա համագործակցություն: ԵՄ-ն շատ քիչ լծակներ ունի Թուրքիայի նկատմամբ և չի կարող Թուրքիային ճնշել և ստիպել ինչ-որ քայլերի գնալ»,- եզրափակեց իր խոսքն Ամանդա Փոլը:
