Սկանդալը, որը ծագել է ԿՀՎ նախկին աշխատակից Էդվարդ Սնոուդենի գաղտնազերծած տեղեկատվության պատճառով, դուրս է եկել Բրազիլիայի և ԱՄՆ-ի հարաբերությունների միջպետական մակարդակ: Այս մասին հայտնում է ITAR-TASS-ը:
Կիրակի Բրազիլիայի արտգործնախարար Անտոնիու Պատրիոտան հայտարարել է, որ իր երկիրը Վաշինգտոնից պարզաբանումներ է պահանջում «Գլոբու» թերթում տեղ գտած հրապարակման առնչությամբ: Համաձայն հրապարակման՝ ԱՄՆ-ը առնվազն 10 տարի Բրազիլիայում իրականացնում է հեռախոսազրույցների և համացանցային թրաֆիքի լայնամասշտաբ լրտեսում:
Հիշեցնենք, որ ԿՀՎ նախկին աշխատակից Էդվարդ Սնոուդենը շարունակում է գտնվել Մոսկվայի «Շերեմետևո» օդանավակայանի տարանցիկ գոտում:
«Բրազիլիայի կառավարությունը խորապես մտահոգված է այն տեղեկություններով, որ ամերիկյան հատուկ ծառայությունները լրտեսել են բրազիլացիների էլեկտրոնային և հեռախոսային կապերը»,- ընդգծել է Պատրիոտան:
Նա հայտնել է, որ հեռախոսային խոսակցությունների և համացանցային թրաֆիքի գաղտնիության պաշտպանության բարձրացման նպատակով Բրազիլիան մտադիր է փոփոխություններ առաջարկել միջազգային կապի կանոններում: Միջազգային կապը ներկայում կարգավորվում է ՄԱԿ-ի մասնագիտացած հաստատության՝ Էլեկտրակապի միջազգային միության կողմից, որի կենտրոնակայանը գտնվում է Ժնևում:
