Սաուդյան Արաբիայում երեկ մահացել է կորոնավիրուսով վարակված լինելու կասկածանքով հոսպիտալացված ևս երկու հիվանդ: Ինչպես նշվում է թագավորության առողջապահության նախարարության հաղորդագրության մեջ, Ջիդա քաղաքում մահացել է 2 տարեկան երեխա, իսկ Արևելյան մարզում՝ 53-ամյա մի տղամարդ: Հենց այդ մարզում են գրանցվել ամենամեծ թվով վարակվածները: Այս մասին հայտնում է ITAR-TASS-ը:
Ընդհանուր առմամբ հիվանդության հետևանքով մահացած սաուդացիների թիվը հասել է 38-ի:
Նախարարության տվյալներով՝ ներկայում հայտնաբերվել են կորոնավիրուսով վարակված ևս 3 հիվանդներ: Երկրում վարակվածների թիվը հասել է 65-ի:
Օրերս Սաուդյան Արաբիայում սկսվում է Ռամադանը, որի ժամանակ արաբական միապետություն են ժամանում հարյուր հազարավոր ուխտավորներ: Առողջապահության համաշխարհային կազմակերպության փորձագետները նախազգուշացրել են մարդկանց մեծ կուտակումները սահմանափակելու միջոցառումների անհրաժեշտության մասին:
