ԱՄՆ նախագահ Բարաք Օբաման կարող է հետաձգել սեպտեմբերի սկզբին նախատեսված Մոսկվա այցը, եթե այդ ժամանակ ԿՀՎ նախկին աշխատակիցը դեռ Ռուսաստանում լինի:
Նախորդ շաբաթ The New York Times-ը գրել է. «Օբաման հազիվ թե մեկնի Մոսկվա, եթե Սնոուդենը դեռևս գտնվի «Շերեմետևոյում»»:
Պետդեպարտամենտին մոտ կանգնած աղբյուրը հայտնել է, որ այս լուրը դիվանագիտական ճանապարհով հասել է Ռուսաստանին: Նրա խոսքերով՝ սեպտեմբերյան գագաթնաժողովին Օբամայի մասնակցության հարցը Վաշինգտոնը առկախված է թողել՝ չբացառելով, որ ԱՄՆ նախագահի փոխարեն Սանկտ Պետերբուրգում կայանալիք G20-ի գագաթնաժողովին կմասնակցի փոխնախագահ Ջո Բայդենը:
ԱՄՆ ազգային անվտանգության խորհրդի ներկայացուցիչ Բերնադեթ Միհանը վստահեցրել է, որ «սեպտեմբերին Բարաք Օբաման մտադիր է Ռուսաստան այցելել»՝ չհստակեցնելով, թե արդյոք խոսքը G20-ի՞ մասին է, թե՞ Մոսկվայում Օբամայի և Պուտինի հանդիպման:
ՌԴ նախագահի մամլո քարտուղար Դմիտրի Պեսկովն էլ, իր հերթին, հայտարարել է, որ «Կրեմլում այդ մասին (վերջնագրի) ոչինչ հայտնի չէ»:
