ՀՀ սփյուռքի նախարար Հրանուշ Հակոբյանն ընդունել է «Middle East Airlines» ավիաընկերության կողմից Բեյրութ-Երևան-Բեյրութ ավիաչվերթի բացման կապակցությամբ Հայաստան ժամանած Լիբանանի պատվիրակությանը:
ՀՀ սփյուռքի նախարարն իր խոսքում նշել է. «Սիրելի հյուրեր այս չվերթի բացումը պատմական քայլ է հայ-լիբանանյան հարաբերություններում: Կարծում եմ, այսօր երկու կողմի համար էլ չափազանց կարևոր է տրանսպորտային միջոցների մատչելիությունը: Հաշվի պետք է առնենք, որ տարածաշրջանային խնդիրների պատճառով լիբանանյան «Middle East Airlines»-ի այս որոշումը անհրաժեշտություն էր Լիբանանում և Սիրիայում ապրող մեր հայրենակիցների համար: Նման չվերթի շահագործումը կօգնի նաև երկու երկրների տնտեսության, մասնավորապես տուրիզմի զարգացմանը»:
Ողջույնի խոսքով հանդես է եկել Լիբանանի արդյունաբերության նախարար հայազգի Վրեժ Սաբունջյանը. «Շնորհակալ եմ Ձեր անկեղծ ու ջերմ ընդունելության համար: Տիկին նախարար, Դուք Ձեր հերթին նպաստում եք հայ-լիբանանյան բարիդրացիական հարաբերությունների զարգացմանը, որը ողջունելի է և գնահատանքի արժանի: Շնորհակալ ենք նաև «Middle East Airlines» ընկերությանը և իմ լիբանանցի գործընկերներին՝ այս նախաձեռնությունը կարևորելու և իրականացնելու համար»:
Ներկաներին ողջունել է նաև «Middle East Airlines» ընկերության նախագահ Մոհամմադ Էլ Հութը, ով մասնավորապես նշել է. «Լիբանանի կառավարությունը մեզ հնարավորություն է ընձեռել 12 ուղղություններով չվերթներ իրականացնել, դրանց թվում է նաև Հայաստանը: Պատասխանատվությունը մեծ է և մենք պետք է աշխատենք այնպես, որ բոլորը գոհ լինեն: Այս չվերթով մենք կօգնենք այն ուղևորներին, ովքեր դժվարությամբ էին հասնում Հայաստան: Հենց առաջին չվերթի ժամանակ բոլոր ուղևորները հայեր էին, որն ինձ համար շատ ուրախալի էր, վայրէջք կատարելիս նրանք երգում էին Հայաստանի հիմնը: Հասկանալի է, որ այս որոշումը շատ ավելին էր, քան ես սպասում էի»:
Իրենց տեսակետներն են արտահայտել նաև Հայաստանում Լիբանանի Արտակարգ և լիազոր դեսպան Ժան Մակարոնը, Լիբանանում Հայաստանի Հանրապետության Արտակարգ և լիազոր դեսպան Աշոտ Քոչարյանը, պատգամավորներ և այլ պաշտոնյաներ:
