«Սոցիալական պաշտպանության քաղաքականությունը ՀՀ ԶՈւ-ում» թեմայով կլոր սեղան-քննարկում էր կազմակերպել Քաղաքական գիտության Հայաստանի ասոցիացիան և Հայաստանում Ֆրիդրիխ Էբերտ հիմնադրամի ներկայացուցչությունը: Քննարկմանը ներկա էին ՀՀ ՊՆ համապատասխան պաշտոնյաներ, հասարակական կազմակերպությունների ներկայացուցիչներ, սոցիալական քաղաքականությամբ զբաղվող փորձագետներ:
Իր զեկույցում ՀՀ պաշտպանության քաղաքականության վարչության բաժնի պետի տեղակալ, ԵՊՀ սոցիոլոգիայի ֆակուլտետի դասախոս, ԵՊՀ հայցորդ Ալեքսանդր Ավետիսյանը նշեց, որ ոչ բավարար սոցիալական պայմանները անվստահություն են ստեղծում զինվորական մասնագիտության նկատմամբ, իսկ այդ բացը չի կարող պայմանագրային համալրումով հատուցվել: Նա ընդգծեց, որ սոցիալական պաշտպանվածության մակարդակի բարձրացումը կարևոր գործոն է հասարակության մեջ զինծառայողների նկատմամբ պատշաճ վերաբերմունքի ձևավորման հարցում:
«Զինծառայողի նկատմամբ վստահության անկումը սոցիալական խնդիրների ոչ բավարար լուծմամբ է պայմանավորված»,- նշեց Ա. Ավետիսյանը:
Նա փաստեց, որ կան օրենսդրական բացթողումներ: Եթե նախկինում սահմանված էր, որ զիծառայողը պետք է ունենար 8 տարվա ծառայություն կենսաթոշակ ստնալու համար, ապա հիմա դարձել է 12 տարի: «Ընդ որում, եթե 12 տարի երեք ծառայություն ունի՝ չի կարող օգտվել զինծառայողին հատկացվող կենսաթոշակից»,- ասաց Ա. Ավետիսյանը: Սակայն նրան հակադարձեց ՊՆ սոցիալական վարչության պետ Արմեն Աղաբալյանը` նշելով, որ 8 տարվա սիստեմ էր գործում, քանի որ բանակը նոր էր կազմավորվել և օրենքը չէր կարող նախատեսել 12 տարի: Բացի այդ, նախկին 50 տարեկանի փոխարեն հիմա 45 տարեկան զինծառայողները կարող են կենսաթոշակ ստանալ:
ԱԺ ներկայացուցիչ Նաիրա Կարապետյանն էլ նշեց, որ չի կարելի բանակի մասին քննարկումներն այսպես անցկացնել, դրանք պետք է լինեին՝ դռնփակ:
ՀՀ ՊՆ Ազգային ռազմավարական հետազոտությունների ինստիտուտի ֆինանսական մասի պետ, ԱՌՀԻ-ի հայցորդ, կապիտան Մհեր Փարվանյանն էլ իր զեկույցում անդրադարձավ զինծառայողների բնակվարձերի հատուցման, հանգստի, արձակուրդի, բնակարանների հատկացման, սոցիալական փաթեթների և վերջերս կառավարության կողմից ընդունված կենցաղային տեխնիկա ձեռք բերելու վարկավորման խնդիրներին:
Քաղաքական գիտության Հայաստանի ասոցիացիայի գործադիր տնօրեն Բենիամին Պողոսյանը ևս մեկ անգամ ընդգծելով խնդրի կարևորությունը՝ ամփոփեց թեման և նշեց, որ Քաղաքական գիտության Հայաստանի ասոցիացիան շարունակելու է ուշադրության կենտրոնում պահել զինծառայողների սոցիալական պաշտպանվածության հիմնախնդիրները՝ համապատասխան մասնագիտական գնահատականներ տալով:
