«Ազգային ճակատ» կուսակցության ղեկավար Մարին Լե Պենը, որը վերջերս է այս պաշտոնում փոխարինել իր հորը` հայտի քաղաքական գործիչ Ժան Մարի Լե Պենին, հայտարարել է, թե ինչ-որ առումով ինքն էլ է Դոմինիկ Ստրոս Կանի զոհը, որը երեկ ձերբակալվել է բռնաբարության փորձ իրականացնելու համար: Այս մասին հաղորդում է Franec Presse գործակալությունը:
«Ես պետք է նշեմ, որ Ֆրանսիայի արդարադատությունը պետք է օրինակ վերցնի ամերիկյանից: Ամերիկյան ոստիկանությունը ստացել է հյուրանոցի սպասուհու բողոքը, և Արժույթի միջազգային հիմնադրամի ղեկավարը ձերբակալվել ու բերման է ենթարկվել ոստիկանություն»,- ասել է Մարին Լե Պենը:
Նա նշել է, որ Ֆրանսիայում Ստրոս Կանի հետ կապված վաղուց են շրջանառվում ուրիշ կանանց նմանատիպ հայտարարությունների մասին լուրերը: «Ես էլ եմ ինչ-որ առումով ինձ նրա զոհը զգացել, երբ բանավիճում էի նրա հետ: Նրա հայտարարությունները լրիվ անտեղի էին»,- ասել է Լե Պենը:
Հիշեցնենք, որ Արժույթի միջազգային հիմնադրամի ղեկավարը ձերբակալվել է Նյու Յորքի օդանավակայանում: Նրան մեղադրում են հյուրանոցի սպասուհու դեմ սեռական ոտնձգություն իրականացնելու մեջ:
