ԱՄՆ-ի Սենտ-Լուիս քաղաքում շուրջ 30 բանտարկյալ հայց են ներկայացրել քաղաքային իշխանությունների դեմ: Բանտարկյալների փաստաբան Դանիել Բրաունի փոխանցմամբ` հայցի պատճառ է հանդիսացել այն, որ բանտապահներն ուղղիչ հաստատության պատերի ներսում կազմակերպել են մարտական ակումբ և բանտարկյալներին ստիպել են կռվել միմյանց հետ, և այդ ամենը կատարվել է քաղաքային իշխանությունների իմացությամբ։
Ինչպես հաղորդում է The Daily News-ը, բանտապահները բանտարկյալներին զույգերի են բաժանել և ստիպել կռվել միմյանց հետ:
«Դրանից հետո մարտերի հաղթողները սկսել են միմյանց հետ կռվել: Սա հիշեցնում է գլադիատորական՝ կյանքի ու մահվան համար մարտերը»,- հայտարարել է փաստաբանը:
Սակայն քաղաքապետարանը պատասխան հայց է ուղարկել դատարան, որում հերքում է մարտերի կազմակերպման փաստը:
Բրաունն իր պաշտպանյալների ցուցմունքներն ապացուցելու համար ցուցադրել է տեսանյութ, որում բանտարկյալները մարտերի ժամանակ ստացած վնասվածքներով են։
Բանտարկյալները պահանջում են ավելի քան 150 միլիոն դոլարի բարոյական փոխհատուցում: Դատական նիստի օրը դեռևս չի նշանակվել:
