Ադրբեջանական APA լրատվական գործակալության փոխանցմամբ՝ Ադրբեջանում Թուրքիայի դեսպան Իսմայիլ Ալփեր Ջոշքունը մեկնաբանել է Hürriyet թերթի մեկնաբան Ֆաթիհ Չեքիրգեի այն հոդվածը, որի համաձայն՝ Թուրքիայի իշխանությունները դիտարկում են Հայաստանի հետ հարաբերությունների կարգավորման հարցը:
«Հայաստանի հետ հարաբերությունների կարգավորման հարցում Թուրքիայի դիրքորոշումը հայտնի է: Հարաբերությունների կարգավորման ճանապարհն անցնում է ադրբեջանական տարածքների վերադարձման միջով: Թե ինչ կլինի հետագայում` մենք կորոշենք Ադրբեջանի հետ միասին»,- ասել է նա:
Դեսպանի խոսքով՝ Թուրքիայի արտգործնախարար Մևլյութ Չավուշօղլուն Ադրբեջանի արտգործնախարար Էլմար Մամեդյարովի հետ քննարկել է երկկողմ ու միջազգային հարցեր, այդ թվում նաև Ղարաբաղյան հակամարտության հետ կապված գործընթացներ:
«Չավուշօղլուն ևս մեկ անգամ ընդգծեց, որ ԼՂ-ի հարցը որքան կարևոր է Ադրբեջանի համար, այնքան կարևոր է նաև Թուրքիայի համար: Հայաստանը շարունակում է իրեն մեկուսացնել տարածաշրջանային համագործակցությունից և համատեղ ամեն տիպի գործունեությունից:
Հակամարտության կարգավորման դեպքում տարածաշրջանում կարող են պայմաններ ստեղծվել նոր նախագծերի համար, որոնց կարող է մասնակցել նաև Հայաստանը: Մեր նախարարը միայն կրկնել է այդ կառուցողական գաղափարը»,- ասել է դեսպանը: