Գյուղատնտեսությունում բերքատվությունը այս տարի ևս բավականին բարձր է լինելու: Այս մասին այսօր կառավարության նիստի սկզբում հայտարարեց Գյուղատնտեսության նախարար Սերգո Կարապետյանը: Նրա խոսքով՝ ոլորտում արդեն արձանագրվել է 1.3 տոկոսի աճ՝ անցած տարվա համեմատ:
«Մթերումները շարունակվում են, աշխատանքնեևր են տարվում դեղձի ու խաղողի մթերումները կազմակերպելու համար, այս առումով խնդիրներ չեն առաջանա: Բարձր բերքատվություն ենք սպասում նաև կարտոֆիլի գծով, այնքան, որ լրիվ բավարարվի ներքին պահանջարկը և մի մասն էլ արտահանվի»,- ասաց Ս. Կարապետյանը:
Ըստ նրա՝ այս տարի մթերվել է արդեն մոտ 4500 տոննա ծիրան՝ անցած ամբողջ տարվա 2260-ի փոխարեն, արտահանվել մոտ 12 հազար տոննա՝ անցած ամբողջ տարվա նույն ծավալի դիմաց: «Այս տարի սպասում ենք լրացուցիչ 5-6 հազար տոննա ծիրանի արտահանում»,- ասաց Ս. Կարապետյանը:
