Վրաստանի նախագահ Միխեիլ Սաակաշվիլին ոչինչ չի հասկանում տնտեսությունից: Ինչպես հաղորդումէ «Գրուզիա Օնլայն»-ը, այս մասին հայտարարել է երկրի վարչապետ Բիձինա Իվանիշվիլին այսօր տեղի ունեցած մամլո ասուլիսում:
Նրա խոսքերով՝ նախկին նախագահ Շևարնաձեի օրոք տնտեսական աճն ավելի արագ է եղել, քան գործող նախագահի օրոք:
«Տնտեսությունն ավելի քիչ է աճել, քան պետք է լիներ: Նրանք կարողացել են հասնել ոչ թե տնտեսական աճի, այլ շատ գումար են հավաքել: Նրանք սովորեցին այնպես գումար հավաքել, որ հետո իրենք սկսեցին բիզնեսով զբաաղվել: Նրանք կարողացան ուղղել Շևարնաձեի օրոք մաքսայինում ստեղծված իրավիճակը: Այստեղ կա նաև իմ վաստակը: Նրանք կարողացան միջոցները կուտակել բյուջեում: Միայն դրանում է կայանում նրանց ձեռքբերումը: Սակայն նրանք նաև դա են խեղաթյուրել»,- նշել է վարչապետը:
Իվանիշվիլիի խոսքերով՝ տնտեսությանն առաջին հերթին անհրաժեշտ է մրցունակություն. «Առաջին հերթին տնտեսությանն անհրաժեշտ է մրցունակություն և ազատություն… Տնտեսությունը պետք է լինի գործող, և ոչ մի բարձրաստիճան պաշտոնյա չպետք է միջամտի: Այն, ինչ տեղի է ունեցել 9 տարվա ընթացքում, հակասում է տնտեսական կառավարմանը» ,- նշել է նա:
Վարչապետը, անդրադառնալով ենթակառուցվածքային նախագծերին, նշել է, որ այս ուղղությամբ նոր իշխանությունների օրոք կծախսվեն ավելի շատ միջոցներ:
