Ռուսաստանի և Ադրբեջանի միջև կնքված համաձայնագրի համաձայն ՌԴ-ն Ադրբեջանին վաճառեց մեկ միլիարդ դոլար արժողությամբ սպառազինություն: Հայաստանում մեծ աղմուկ բարձրացրած այս գործարքի և Ադրբեջանին մատակարարված զինտեխնիկայի նշանակության մասին տարաբնույթ մեկնաբանություններ եղան: Ռազմական փորձագետներից ոմանց գնահատմամբ՝ Ռուսաստանն Ադրբեջանին վաճառել է այնպիսի զինտեխնիկա, որը նախատեսված է խաղաղ բնակչությանը ոչնչացնելու համար, իսկ ոմանց կարծիքով՝ Ռուսաստանն Ադրբեջանին հին զենք է վաճառել: Ներկայացնում ենք Ադրբեջանի ձեռքբերած զինատեսակների ցանկը, սպառազինության ողջ նկարագրությունը՝ նշանակությունը, տեխնիկական հնարավորությունները, հզորությունն ու փորձառությունը:
Ռուսական մամուլի համաձայն՝ Ադրբեջանը Ռուսաստանից գնել է 3 գումարտակ Т-90С տանկ, 100 БМП-3 հետևակի մարտական մեքենա, 18 Мста-С ինքնագնաց հրետանային համակարգ (մեկ դիվիզիոն), ևս 18 «Սմերչ» տիպի ռեակտիվ համազարկային համակարգ, «Վենա» տեսակի 18 ինքնագնաց հրետանային համակարգ, 6 ծանր հրետանային համակարգ և այլ զինտեխնիկա:
Т-90С զրահամեքենան ռուսական մարտական հիմնական զրահամեքենան է, ստեղծվել է 1980-ականների վերջին, 1990-ականների սկզբին նախագծող Վլադիմիր Պատկին Իվանովիչի կողմից: Т-90С –ն օգտագործվում է հակառակորդի պաշտպանությունը ճեղքելու, օպերատիվ և ռազմավարական գործողությունների ընթացքում տակտիկական հաջողություն զարգացնելու, ինչպես նաև պաշտպանական նպատակներով:Այս զրահամեքենան թեթև քաշ և փոքր չափեր ունի, իսկ տեխնիկական հնարավորությունները՝ հիմնական զինուժը, տեղակայված է պտտվող աշտարակում: Т-90С զրահամեքենային հատուկ են էքստրեմալ պայմաններում մարտական գործողություններ վարելու ունակությունը, բոլոր մեխանիզմների բացառիկ հուսալիությունը, անկախ կլիմայական և ճանապարհային պայմաններից՝ հիանալի շարժունակությունը և մանևրելու կարողությունը, ինչպես նաև մարտի նախապատրասվելու նվազագույն ժամանակը:
2001-2010 թվականների ընթացքում աշխարհում ամենաշատը վաճառված մարտական զրահամեքենան է: 2011 թվականին նոր Т-90-ի գինը կազմել է 118 մլն ռուբլի: Նույն թվականի վերջից Ռուսաստանի Զինված ուժերին զրահամեքենայի վաճառքը դադարեցվել է:
БМП-3- ռուսական զրահապատ, թրթուրավոր մեքենան նախատեսված է անձնակազմի տեղաշարժի համար: Առաջին անգամ հրապարակայնորեն ցուցադրվել է 1990 թվականին: Գործածվել է նաև խորհրդային բանկում: Ներկայումս «БМП-3»-ը աշխարհում ամենատարածված մարտական մեքենաներից է:
Мста-С– ռուսական ժամանակակից ինքնագնաց հրետանային մեքենան նախատեսված է տակտիկական միջուկային միջոցների, հրետանային և ականանետ մարտկոցների, զրահամեքենաների և այլ զրահատեխնիկայի, հակատանկային միջոցների, կենդանի զինուժի, հակաօդային և հակահրթիռային միջոցների ոչնչացման համար:
Համազարկային կրակի «Սմերչ» ռեակտիվ համակարգն առավելապես հեռահար համակարգ է՝ նախատեսված կենդանի զինուժի, ոչ զրահապատ կամ քիչ զրահապատ տեխնիկայի, հրետանու, տակտիկական հրթիռների, զենիթային համալիրների, ուղղաթիռների ոչնչացման համար : Մարտին պատրաստվելու համար պահանջում է 3 րոպե: Կրակոցից հետո մարտկոցը կրկին գործելու պատրասստ լինում է մեկ րոպեից: «Սմերչ»-ն իր տեսակի մեջ գնահատվում է, որպես աշխարհում ամենահզոր զինատեսակ:
Ինքնագնաց հրետանային միավոր «Վենա»-ն նախատեսված է մինչև 13 կմ հեռավորության վրա կենդանի զինուժին ճնշելու, հրետանային և ականանետ մարտկոցների, հրթիռային սարքավորումների, կրակային միջոցների ոչնչացման համար:
«Սոլնցեպյոկ» ծանր կրականետային համակարգի նախատիպն առաջին անգամ գործածվել է Աֆղանստանում՝ 1988-1989 թվականներին: Նախատեսված է թեթև զրահավորված և ավտոմոբիլային տեխնիկան շարքից հանելու , շինություններ քանդելու և այրելու, հակառակորդի կենդանի զինուժը ոչնչացնելու համար:
С-300ПМУ-2 զենիթահրթիռային համակարգը նախատեսված է ռազմաբազաները, արտադրական և վարչական խոշոր շինությունները հակառակորդի օդային հարձակումներից պաշտպանելու համար: Ընդունակ է ոչնչացնել բալիստիկ և աէրոդինամիկ թիրախները: Բոլոր առաջադրանքները համակարգըշնորհիվ թվային միջոցների, կատարում է ավտոմատ:
Тор-2МЭ զենիթահրթիռային համալիրը նախատեսված է հակաօդային և հակահրթիռային պաշտպանության խնդիրներ լուծելու, վարչական, տնտեսական և մարտական կարևորագույն օբյեկտների պաշտպանության համար: Կարող է աշխատել ինչպես ձեռքի կառավարմամբ, այնպես էլ ավտոմատ ռեժիմով:
