Երևանի Կենտրոն և Նորք-Մարաշ վարչական շրջանների դատարանում՝ դատավոր Ալեքսեյ Սուքոյանի նախագահությամբ, ՀՀ նախկին նախագահ Ռոբերտ Քոչարյանն ու նրա որդին՝ Սեդրակ Քոչարյանն ընդդեմ «Ժամանակ» օրաթերթի հիմնադիր «Սկիզբ Մեդիա» ընկերության և «Առաջին լրատվական» ընկերության հայցադիմումի գործով դատաքննությունն այսօր տեղի չունեցավ:
Դատական նիստը չի կայացել հայցվորներ Ռոբերտ և Սեդրակ Քոչարյանների ներկայացուցիչ Արփինե Մելիքբեկյանի բացակայության պատճառով: Ա.Մելիքբեկյանը դիմել էր դատարանին՝ խնդրելով հայցադիմումի քննությունը հետաձգել մինչև հոկտեմբեր ամիսը, քանի որ ինքը գտնվում է ֆիզիոլոգիական արձակուրդի մեջ:
Դատարանը բավարարել է միջնորդությունը և դատական նիստը հետաձգել մինչև հոկտեմբերի 7-ը:
Նշենք, որ ՀՀ երկրորդ նախագահ Ռոբերտ Քոչարյանի ընտանիքն արդեն երկրորդ անգամ է դատական գործ հարուցում «Ժամանակ» օրաթերթի հիմնադիր և հրատարակիչ «Սկիզբ մեդիա կենտրոն» ՍՊԸ-ի և «Առաջին լրատվական»-ի հիմնադիր և պատասխանատու «Առաջին լրատվական» ՍՊԸ-ի դեմ: Այս անգամ պահանջը պատիվը և արժանապատվությունը արատավորող տեղեկությունների հերքումն է լրատվամիջոցի կողմից և 5 միլիոն դրամի փոխհատուցումը:
2012 թվականի նոյեմբերի 27-ին և 29-ին «Առաջին լրատվական»-ով հրապարակվել են համապատասխանաբար՝ «Ինչ կապ ունեն Քոչարյանն ու Ծառուկյանը «Նաիրիտի» հետ» և «Քոչարյանների րոպեավճարները» հոդվածները, որոնցում, ըստ հայցվոր կողմի, տեղ են գտել Ռոբերտ և Սեդրակ Քոչարյանների պատիվն ու արժանապատվությունը արատավորող տեղեկություններ:
Քոչարյանները հատկապես վիրավորվել են հետևյալ պարբերություններից՝ «Այսօր արդեն տեղեկություններ են հրապարակվում, որ «Նաիրիտում» իր պաշտոնական կամ ոչ պաշտոնական բաժնեմասն ունի նախկին նախագահ Ռոբերտ Քոչարյանը: Չէ՞ որ գործարանի վերջին սեփականաշնորհումը հենց նրա պաշտոնավարման ծաղկուն շրջանում է եղել: Առանց նրա համաձայնության նման շահութաբեր ընկերության հետ որևէ գործարք հնարավոր չէր իրականացնել: Տեղեկություններ կան նաև, որ «Նաիրիտը» ցանկացել է և մինչև օրս էլ ցանկանում է գնել նաև ԲՀԿ առաջնորդ Գագիկ Ծառուկյանը: Այն ժամանակ Քոչարյանը չի համաձայնել, քանի որ ցանկացել է անձամբ տնօրինել գործարանի ճակատագիրը:
Ժամանակին նաև տեղեկություններ էին հրապարակվում, թե Ռ. Քոչարյանը պաշտոնական կամ ոչ պաշտոնական կերպով վաճառվող կաուչուկի յուրաքանչյուր տոննայի շահույթի մեջ կոնկրետ բաժին ունի: Օրինակ՝ Քոչարյանի ավագ որդուն՝ Սեդրակին է պատկանում «ՎիվաՍել» ծառայությունից բջջային հեռախոսով համեմատաբար ցածր սակագնով միջազգային հեռախոսազանգեր իրականացնելու VoIP ծառայությունը:
«Առաջին լրատվական»-ին տեղեկացրին, որ այդ ծառայության հեռախոսազանգի յուրաքանչյուր րոպեի մեջ Սեդրակ Քոչարյանն ունի կոնկրետ բաժին, ինչը կախված է այն հանգամանքից, թե դեպի տվյալ երկիր զանգի մեկ րոպեն ինչ արժե: Ասում են, թե որքան բարձր է սակագինը, այնքան բարձր է դրա մեկ րոպեում Սեդրակ Քոչարյանի բաժնեմասը»:
Հայցադիմումի մեջ նշվում է, թե մեր ունեցած տեղեկությունները զրպարտություն են՝ հետևյալ պատճառաբանությամբ. պատասխանողները ներկայացրել են հրապարակայնորեն, և ներկայացրել են որպես փաստացի տվյալներ: Հայցվոր կողմի դիտարկմամբ՝ այս տվյալները չեն համապատասխանում իրականությանը և արատավորում են հայցվորների պատիվն ու արժանապատվությունը:
Քոչարյանները «Առաջին լրատվական»-ի հիմնադիր «ՍԿԻԶԲ ՄԵԴԻԱ ԿԵՆՏՐՈՆ»-ից պահանջում են հերքել վերը նշված հոդվածները, վճարել 5.000.000 դրամ իրենց իրավունքների ու պաշտպանության համար կատարած ծախսերը հոգալու համար, բացի այդ՝ «արգելանք դնել «Առաջին լրատվական»-ի գույքի և դրամական միջոցների վրա հայցագնի չափով՝ որպես հայցի ապահովման միջոց:
