Դորտմունդի «Բորուսիա»-ի նախկին կիսապաշտպան Իլկայ Գյունդողանը մեկնաբանել է գերմանական ակումբից Հայաստանի ազգային հավաքականի կիսապաշտպան Հենրիխ Մխիթարյանի տեղափոխությունն անգլիական «Մանչեսթեր Յունայթեդ»:
«Հենրիխը «Բորուսիա»-ում խաղաց երեք տարի: Եթե ճիշտն ասեմ, ապա առաջին երկու մրցաշրջանը նրա համար հեշտ չէին: Նա այնպիսի ֆուտբոլիստ է, ում անհրաժեշտ է վստահություն սեփական ուժերի նկատմամբ: Նրան պետք է միշտ խաղալ, ինքնահաստատվել և ամեն ինչ լավ կլինի: «Բորուսիա»-ն այն ժամանակ հաջող չէր խաղում և Մխիթարյանին հեշտ չէր ադապտացվել:
Հենրիխը որոշ խնդիրներ ուներ, սակայն նախորդ մրցաշրջանում նա անհավանական խաղ ցուցադրեց: Հնարավոր է, նախորդ մրցաշրջանում Մխիթարյանը «Բորուսիա»-ի ամենակարևոր խաղացողն էր: Եվ եթե նա շարունակի նույն ոգով, ապա մեծ ազդեցություն կունենա «Մանչեսթեր Յունայթեդ»-ի խաղի վրա: Ես նրան ամենալավն եմ մաղթում»,- Four Four Two-ն մեջբերում է Գյունդողանի խոսքերը:
Վերջինս ևս հեռացել է «Բորուսիա»-ից` տեղափոխվելով «Մանչեսթեր Սիթի»: 27-ամյա հայազգի կիսապաշտպանի տեղափոխության համար «Մանչեսթեր Յունայթեդ»-ը «Բորուսիա»-ին կվճարի 42 մլն եվրո:
