Interfax-ի փոխանցմամբ` Ստամբուլի Աթաթյուրքի անվան օդանավակայանում ահաբեկչության կազմակերպման մեջ կասկածյալ Ահմեդ Չատաևը Միխեիլ Սաակաշվիլու կառավարման տարիներին եղել է վրացական հատուկ ծառայությունների գործակալ: Այդ մասին հայտարարել է Վրաստանի խորհրդարանի պաշտպանության ու անվտանգության հարցերով կոմիտեի նախագահ Իրակլի Սեսիաշվիլին:
«Ցավոք, Ահմեդ Չատաևը Սաակաշվիլու ղեկավարման տարիներին եղել է հատուկ ծառայությունների գործակալ: Նա ունեցել է Վրաստանի քաղաքացու անձնագիր, որի միջոցով մեկնել է տարբեր երկրներ և կատարել հատուկ առաջադրանքներ, ինչի համար ստացել է աշխատավարձ»,- հայտնել է Սեսիաշվիլին:
Հուլիսի 1-ին Օդեսայի նահանգապետ Միխեիլ Սաակաշվիլին Facebook-ի իր էջում հայտնել էր, որ Չատաևը Վրաստանում մի քանի ամիս գտվել է կալանքի տակ: «Նա ձերբակալվել է իմ կառավարության կողմից` Վրաստանում գեներալ Գեորգի Լորդկիպանիձեի ղեկավարությամբ հակաահաբեկչական գործողություններ իրականացնելու ժամանակ, որն այժմ գլխավորում է Օդեսայի ոստիկանությունը: Մեր ուժերի երեք աշխատակից զոհվել են այդ գործողության ընթացքում»,- գրել է Սաակաշվիլին:
Նրա խոսքով` 2012 թվականին եկած նոր կառավարությունը` Բիձինա Իվանիշվիլու գլխավորությամբ, ազատել է Չատաևին, քանի որ նա համարվել է քաղբանտարկյալ:
