«Նախագահի գնահատականների հետ միշտ համակարծիք եմ»: Henaran.am-ի փոխանցմամբ՝ այսօր ԱԺ-ում լրագրողների հետ ճեպազրույցում ասել է ԱԺ նախագահ Հովիկ Աբրահամյանը` անդրադառնալով Սերժ Սարգսյանի վերջին ելույթին, որտեղ նախագահը կոշտ գնահատականներ էր տվել Վերահսկիչ պալատի մասին:
«Ես հայտնել եմ իմ կարծիքը, տպավորությունը, հաշվետվության ներկայացման գործընթացի հետ կապված»,-նշել է Աբրահամյանը` ի պատասխան հարցին, թե իր գնահատականներն ավելի կոշտ էին, քան նախագահինը:
Լրագրողների այն դիտարկմանը, որ ՀՀԿ-ին և հենց ԱԺ նախագահին դժվար օրեր են սպասվում, քանի որ նախագահը նշել է, որ ՀՀԿ խմբակցության հետ խորհրդակցություն է անցկացնելու և խոսելու է նրանց պահվածքի մասին, նա արձագանքել է. «Այսօր ես կարծիք չեմ ուզում հայտնել, սպասենք»:
Հարցին, թե չի կարծում, որ զրույցը շատ կոշտ է լինելու, ԱԺ նախագահը պատասխանել է. «Ոչ, դուք միշտ կոշտացնում եք ձեր տեսակետը»:
ԱԺ նախագահը ևս մեկ անգամ կրկնել է, որ ինքը ներկայացրել է իր տպավորությունները հաշվետվության վերաբերյալ և քանի որ այդ տպավորությունը, այդ գնահատականները պետք է հիմնավորվեն, ինքը հանձնարարական է տվել այդ հաշվետվությունն ուղարկել գլխավոր դատախազություն, որը պետք է եզրակացություն տա, թե արդյոք չարաշահումներ և յուրացումներ եղել են, թե ոչ:
«Հարկավոր է այնպես անել, որ բյուջեի գումարները ծախսվեն արդյունավետ»,-նշել է Հովիկ Աբրահամյանը:
Լուսանկարը՝ PanARMENIAN Photo-ի
