ՄԱԿ-ի Անվտանգության խորհրդում նախագահությունն այսօր Միացյալ Թագավորությունից օրացուցային մեկ ամսով անցնում է ԱՄՆ-ին: Անվտանգության խորհրդի՝ հուլիս ամսվա աշխատանքի ծրագիրը պաշտոնապես կներկայացվի առաջիկա օրերին: Սահմանված պրակտիկայի համաձայն՝ ամսվա առաջին օրերին կկայանա խորհրդում նախագահող երկրի մշտական ներկայացուցչի մամլո ասուլիսը:
Սյուզան Ռայսը, որը ՄԱԿ-ում ամերիկյան դիվանագիտական կորպուսը ղեկավարել է 2009-ի հունվարից, հունիսին նշանակվել է ԱՄՆ նախագահի՝ ազգային անվտանգության հարցերով խորհրդական: Նա լրագրողների հետ ԱԽ-ում վերջին անգամ շփվել է հունիսի 25-ին: Այս մասին հայտնում է ITAR-TASS-ը:
ԱՄՆ նախագահ Բարաք Օբամայի կողմից ՄԱԿ-ում ԱՄՆ-ի մշտական ներկայացուցչի պաշտոնում առաջադրված ակադեմիկոս և լրագրող Սամանտա Փաուերի թեկնածությունը դեռևս չի հաստատվել այդ պաշտոնում: Այդ իսկ պատճառով հուլիսին ԱԽ նախագահի պարտականությունները կդրվեն ԱՄՆ մշտական ներկայացուցչի տեղակալ Ռոզմարի Դիկարլոյի վրա:
Հուլիս ամսվա ընթացքում ԱԽ անդամները պետք է երկարացնեն 4 խաղաղապահական զորակազմերի օպերացիաների մանդատները: Խոսքը Հարավային Սուդանում ՄԱԿ-ի առաքելության, Կիպրոսում ՄԱԿ-ի զինված ուժերի ներկայության, Կոտ Դ՝Իվուարում ՄԱԿ-ի օպերացիայի և Դարֆուրում ՄԱԿ-ի ու Աֆրիկյան միության համատեղ օպերացիայի մասին է:
Իրազեկ աղբյուրների փոխանցմամբ՝ նախագահության ընթացքում ԱՄՆ-ը մտադիր է դեբատներ կազմակերպել լրագրողների պաշտպանության և Մերձավոր Արևելքում տիրող իրավիճակի կապակցությամբ:
