Վրացական GHN լրատվական գործակալության փոխանցմամբ, Վրաստանում գտնվող Չեխիայի արտգործնախարար Կարել Շվարցենբերգն իր վրաց գործընկեր Գրիգոլ Վաշաձեի հետ հանդիպումից հետո հայտարարել է, որ Չեխիան աջակցում է Վրաստանի տարածքային ամբողջականությանը.
«Վրաստանն այն հազվագյուտ երկրներից է, որոնց հետ Չեխիան առանձնահատուկ հարաբերությունների մեջ է գտնվում: Դրա պատճառն այն է, որ նախկինում երկու երկրներն էլ օկուպացում են վերապրել և գիտեն դրա գինը: Հենց դա էլ համերաշխություն է ստեղծում երկու երկրների միջև:
Օկուպացված տարածքների հարցը շատ կարևոր է, և մենք կարիք չունենք միմյանց բացատրելու, թե դա ինչ է: Մոտավորապես, 30 տարի առաջ նույն իրավիճակը տիրում էր մեր երկրում: Երբ խոսքը գնում է Վրաստանի օկուպացման մասին, մենք ողջ ուժով պաշտպանում ենք Վրաստանի շահերը: Չեխիան շահագրգռված է Վրաստանի հետ բոլոր ոլորտներում համագործակցության զարգացմամբ»:
Հիշեցնենք, որ այսօր պետք է տեղի ունենա նաև չեխ-վրացական գործարար ֆորում:
