Այսօր, հունիսի 30-ին՝ նախագահ Մուհամմադ Մուրսիի կառավարման 1-ին տարելիցի օրը Եգիպտոսում ընդդիմությունը մտադիր է զանգվածային բողոքի ակցիաներ իրականացնել՝ նոր նախագահական ընտրություններ նշանակելու նպատակով: Al-Arabiya պարբերականը հաղորդում է, որ քաղաքական ճգնաժամի ֆոնին երկրում սրվել է վառելիքային ճգնաժամը:
Կահիրեի փողոցներում բենզալցակայանների կողքին կանգնած են տասնյակ ավտոմեքենաներ, որոնք արգեկափակել են ճանապարհները և կաթվածահար արել մայրաքաղաքի տրանսպորտային հաղորդակցությունը։
Եգիպտոսի զինվորականները բողոքի ակցիաների նախօրեին շրջապատել էին նախագահական նստավայրը, բոլոր ելումուտերը փակվել էին բետոնե բլոկներով, փշալարարերով և ռազմական տեխնիկայով:
Հիշեցնենք, որ հունիսի 26-ին Մուրսին հեռուստատեսությամբ դիմել էր եգիպտացիներին: 2.5 ժամ տևած իր ելույթում նա կոչ էր արել սկսել ազգային երկխոսություն, ինչպես նաև ստեղծել բոլոր քաղաքական ուժերի ներկայացուցիչներից բաղկացած հանձնաժողով, որը կզբաղվի սահմանադրական բարեփոխումներով:
Այս ելույթը, սակայն, առանձնապես տպավորություն չի գործել: Ավելին, «Մուսուլման եղբայրների» նախկին ղեկավարներից Սարբաթ էլ-Հերբավին այս ելույթն անվանել է «Մուրսիի հրաժեշտի խոսքը»: Նա նաև կարծիք է հայտնել, որ նախագահը կորցրել է ինքնատիրապետումը. նրա խոսքերն անհավասարակշիռ են եղել:
Եգիպտոսում իրավիճակն այնքան է սրվել, որ տեղի են տվել նաև երկրի «գորշ կարդինալի»՝ պաշտպանության նախարար Աբդել Ֆաթահ էլ-Սիսիի նյարդերը: Նա ընդգծել է, որ զորքը լուռ չի հետևի բռնություններին, և կողմերին փոխզիջման կոչ է արել: Էլ-Սիսին կարծում է, որ եգիպտական հասարակությունում պառակտում է տեղի ունենում, որն էլ սպառնում է երկրի գոյությանը:
