Քաղաքական ուժերի «արձակուրդի» հետ մեկտեղ կարծես թե հանգստի է անցել նաև քաղաքացիական հասարակությունը, որոնց արձագանքը վերջին իրադարձություններին շատ պասիվ է:
«Առաջին լրատվական»-ի հետ զրույցում քաղաքացիական հասարակության ակտիվիստ, ՌԱՀՀԿ փորձագետ Սարո Սարոյանը համաձայնեց, որ քաղաքացիական հասարակությունը պասիվացել է, և նշեց մի քանի պատճառներ. «Պասիվությունն անզեն աչքով էլ է նկատելի, և դա ըստ էության պայմանավորված է ինչ-ինչ ակնկալիքների, սպասելիքների ծրագրերի խաթարումների հետ: Քաղաքացիական նախաձեռնությունները տարբեր ժամանակաշրջաններում տաբեր ակտիվություն են դրսևորում, բայց այսօրվա պասիվությանը միգուցե նպաստում է քաղաքական դաշտի ամորֆ վիճակը: Կարծում եմ՝ քաղաքացիական խմբերը ևս զբաղված են վերակողմնորոշումներ, պայքարի ինչ-որ նոր մարտավարություններ, ռազմավարություններ փնտրելով»:
Մեր զրուցակցի կարծիքով՝ ինչ-ինչ հարցերի պատասխաններ իրենց մեջ գտնելուց հետո, հավանաբար, կակտիվանան, կակտիվանան նաև քաղաքական դաշտի ընդհանուր ակտիվության հետ միաժամանակ:
Սարո Սարոյանը համաձայն չէ այն տեսակետի հետ, թե քաղաքացիական նախաձեռնությունները ակտիվանում են ընտրությունների շրջանում միայն, և որպես օրինակ նշեց Մաշտոցի պուրակի, «Հարսնաքարի», Քաջարանի դեպքերը, որոնք ընտրությունների հետ որևէ առնչություն չունեին. «Եթե քաղաքացիական նախաձեռնությունները, խմբերը իրենց գործունեությունը կապեն ընտրական գործընթացների հետ, ապա իրենք կպարտվեն և կձախողեն:
Աշնանը, հավանաբար, շատ կակտիվանան, ամռանը ընդհանրապես նման կարգի գործունեություն ծավալելն անիմաստ է. ինչպես քաղաքական գործընթացներն են ամեն տարի հուլիս-օգոստոս ամիսներին պասիվանում, այնպես էլ քաղաքացիական նախաձեռնությունների պայքարը երբեմն, այսպես ասած, արգելանքների է հանդիպում, բայց կարծում եմ՝ ինչ-ինչ խնդիրներ լուծելուց հետո քաղաքացիական խմբերը նորից կլծվեն իրենց պայքարի գործին»:
Հետաքրքրվեցինք նաև, թե ինչու բավարարար ակտիվություն չցուցաբերվեց գազի գնի թանկացման ակցիաների հետ կապված, և ինչու միայն նախաձեռնության անդամները բարձրաձայնեցին խնդիրը, ինչին ի պատասխան՝ Սարո Սարոյանն ասաց. «Այդ նախաձեռնությանը մասնակցում էին այն մարդիկ, ովքեր ակտիվ էին նաև նախորդ նախաձեռնություններում: Ես ինքս այդ գործընթացների մեջ եմ ու շատ լավ գիտեմ՝ ուղղակի ֆիզիկապես էլ հնարավոր չէ ամեն տեղ հասնել, ռեժիմն ամեն օր է խնդիրներ ստեղծում հանրության համար: Նույն պայքարողներն են, որոնք պայքարի մի կետը թողած՝ անցնում են մյուս խնդրին: Գազի գնի խնդրի հետ կապված՝ նախաձեռնության մեծ մասը բոլոր դիրքերում կար, տվյալ քաղաքացիները պասիվ չեն եղել, ուղղակի ֆիզիկապես կարող են ամեն տեղ չհասցնել»:
