106 կողմ, 6 դեմ ձայների հարաբերակցությամբ այսօր ԱԺ արտահերթ նիստում ընդունվեց 4+4+4 ձևաչափով ձեռք բերված համաձայնությունը: Դեմ էին պատգամավորներ Նիկոլ Փաշինյանը, Հրանտ Բագրատյանը, Զարուհի Փոստանջյանը, Ռուբեն Հակոբյանը, Թևան Պողոսյանը և Խաչատուր Քոքոբելյանը:
Քվեարկությունից առաջ ՀԱԿ պատգամավոր Գագիկ Ջհանգիրյանը հայտարարեց, որ քանի որ իրենց խմբակցության գործընկերները մասնակցել են 4+4+4 ձևաչափով քննարկմանը, այսօր հարգելի պատճառով բացակայում են. «Ես եմ բարձրաձայնում, որ այս ֆորմատը նախաձեռնել է ՀԱԿ-ը՝ մյուս ուժերի հետ միասին, խնդիրները ձևակերպել ու ներկայացրել է նույնպես մեր խմբակցությունը ու ստորագրել համատեղ հայտարարությունը: Մենք կողմ ենք այս փոփոխություններին, սակայն դա չի նշանակում, որ կողմ ենք ընդհանուր օրենսգրքին, հատկապես բաց համամասնական համակարգին»:
ԲՀԿ խմբակցության ղեկավար Նաիրա Զոհրաբյանը հայտարարեց, որ սա համատեղ լուրջ ջանքերի ներդրմամբ աշխատանքի արդյունք է. « Մենք կողմ ենք, քանի որ կան առաջարկություններ, որոնք մենք ենք նախաձեռնել»:
«Ժառանգության» պատգամավոր Ռուբեն Հակոբյանն իր խոսքում նշեց, որ սա նախադեպը չունեցող գործարքատիպ բան է, ու կա բարեհաճ վերաբերմունք բոլոր ուժերի կողմից. «Սակայն եթե-ով պայմանավորված նախագծին ես չեմ կարող կողմ լինել»:
Խաչատուր Քոքոբելյանը նշեց, որ երեք առաջարկ էր ներկայացրել, որը չընդունվեց. «Նույնիսկ հարյուր տոկոսանոց ընտրության դեպքում այս օրենսգիրքը չի կարող տալ այն պատկերը, որ ցանկանում ենք ստանալ: Ես այս փոփոխությունները համարում եմ կոսմետիկ փոփոխություններ և դեմ եմ քվեարկելու»:
ԲՀԿ խմբակցության անդամ Էլինար Վարդանյանը հայտարարեց, որ սրանք տեխնիկական փոփոխություններ են, սակայն կարևոր են. «Համախմբում»- ը կողմ է քվեարկելու»:
Մանրամասները՝ տեսանյութում:
