Ռուսական RIA Novosti լրատվական գործակալության փոխանցմամբ՝ Թուրքիայի արտգործնախարար Մևլյութ Չավուշօղլուն հայտարարել է, որ գերմանացի քաղաքական գործիչների կողմից երկրի հարավ-արևելքում գտնվող «Ինջիրլիքի» ավիաբազա այցելելը տեղին չէ:
Ավելի վաղ Spiegel շաբաթաթերթը հայտնել էր, որ Անկարան գերմանական պատվիրակությանը չի թույլատրել այցելել «Ինջիրլիք», ինչի համար պատճառ է հանդիսացել հունիսի 2-ին Բունդեսթագի կողմից Հայոց ցեղասպանությունը ճանաչող բանաձևի ընդունումը:
Չավուշօղլուն հայտարարել է, որ «Ինջիրլիքի» բազա այցելել ցանկացող զինվորականների ու տեխնիկների խմբերի համար մուտքն ազատ է այնտեղ. «Սակայն տվյալ դեպքում ոչ տեղին ենք համարում քաղաքական գործիչների կողմից ու ոչ ռազմական կազմակերպությունների կողմից բազա այցելելը»:
«Ինջիրլիքի» ավիաբազայում ծավալվել է բունդեսվերի առաքելությունը: 2015 թվականի դեկտեմբերին այստեղ հայտնվել են Գերմանիայից ուղարկված Tornado հետախուզական ինքնաթիռներ, որոնք ԴԱԻՇ-ի դեմ պայքարին մասնակցում են տեղեկատվություն հավաքելով ու փոխանցելով: Ներկայումս Թուրքիայում գտնվում է մոտ 200 գերմանացի զինծառայողներ, որոնց գտնվելու համար տրված մանդատը սպառվում է դեկտեմբերի 31-ին:
