Ժամանցային արդյունաբերության 100 ամենաազդեցիկ մարդկանց ցուցակը գլխավորել է Walt Disney ընկերության նախագահ Ռոբերտ Այգերը՝ The Hollywood Reporter ամսագրի վարկածով: Պարբերականն այդ վարկանիշային ցուցակը հրապարակել է չորեքշաբթի:
Տասներորդ տեղում օսկարակիր դերասան, պրոդյուսեր, հասարակական գործիչ Լեոնարդո Դի Կապրիոն է: «Հնարավոր է, նա հին դպրոցի վերջին կինոաստղն է, ով դեռ կարող է ինքնուրույն նկարահանել ոչ սերիական ֆիլմ: «Փրկվածը» գործնականում մեկ դերասանի ֆիլմ է, բայց նրան հաջողվել է 532 մլն դոլար հավաքել ամբողջ աշխարհում, և դա նախևառաջ 41-ամյա Դի Կապրիոյի արժանիքն է,- նշում են լրագրողները:- Նա նաև շատ բան է անում որպես բարերար՝ հատուկ ուշադրություն հատկացնելով աշխարհում էկոլոգիական խնդիրներին»:
Ինչ վերաբերում է «հարյուրյակի» առաջատարին, ապա պարբերականը գրում է. «65-ամյա Բոբ Այգերը կարող է համարվել ժամանցային արդյունաբերության ամենաազդեցիկ մարդը՝ աշխարհի խոշորագույն մեդիա-ընկերությունը իմաստուն կառավարելու համար»:
Վարկանիշային ցուցակի երկրորդ տեղում Մերդոք ընտանիքն է՝ մեդիամագնատ, 21st Century Fox ընկերության համանախագահ 85-ամյա Ռուպերտ Մերդոքը, ինչպես նաև նրա երկու որդիները՝ Լահլաբը և Ջեյմսը:
Ամենաազդեցիկ անձանց երրորդ տեղում CBS Corp. մեդիահոլդինգի ղեկավար Լեսլի Մունվսն է: Լավագույն տասնյակում են նաև NBC Universal հեռարձակող ընկերության ղեկավար Սթիվ Բուրքը և Walt Disney ստուդիայի ղեկավար Ալան Հորնը:
Ժամանցային ոլորտի 100 ամենաազդեցիկ մարդկանց թվում պարբերականը նշում է նաև ռեժիսորներ Սթիվեն Սփիլբերգին, Ջեյմս Քեմերոնին, Մարտին Սկորսեզեին, հաղորդավարուհի և հասարակական գործիչ Օփրա Ուինֆրիին, դերասանուհի Ջենիֆեր Լոուրենսին, դերասաններ Բրեդ Փիթին և Ռոբերտ Դաունի-կրտսերին:
