Ոստիկանները խափանել են «օրենքով գողերի»՝ Մոսկվայի ռեստորաններից մեկում ծրագրված հավաքը՝ հայտնում է RIA Novosti-ն՝ հղում կատարելով Կենտրոնական դաշնային շրջանի ՆԳՆ-ին:
«Օպերատիվ աշխատակիցները նախապես տեղեկություն են ստացել մայրաքաղաքի Լենինսկի պողոտայի ռեստորաններից մեկում քրեա-հանցավոր աշխարհի ղեկավարների ծրագրված հանդիպման մասին: Այստեղ պետք է քննարկվեին «ազդեցության ոլորտի» հարցեր ու տեղի ունենար «գողական» կարգավիճակի նոր հավակնորդների «թագադրություն»»,- ասվում է հաղորդագրության մեջ:
Հանցագործ հեղինակություններին տարել են ոստիկանական մոտակա տեղամասեր, որտեղ ստուգել են նրանց մատնահետքերը՝ պարզելու, թե նրանք ինչքանով առնչություն ունեն Ռուսաստանի տարածքում կատարված հանցագործությունների հետ:
Ոստիկանության տվյալով՝ այս տարի իրավապահները ձերբակալել են 12 մարդու, որոնք իրենց «օրենքով գող» են համարում:
