Վենեսուելան անկասկած ապաստան կտրամադրի ԿՀՎ նախկին աշխատակից Էդվարդ Սնոուդենին: Այս մասին հայտնել է Վենեսուելայի նախագահ Նիկոլաս Մադուրոն: Երեկ նա հայտնել էր, որ Սնոուդենը դեռևս իրենց չի դիմել՝ քաղաքական ապաստան տրամադրելու խնդրանքով: Այս մասին հայտնում է ITAR-TASS-ը:
«Եթե մենք ստանայինք նման խնդրանք, մենք կմտածեինք և անկասկած դրական պատասխան կտայինք, քանի որ քաղաքական ապաստանը միջազգային մարդասիրական իրավունքների մաս է՝ կոչված պաշտպանելու մարդկանց, ովքեր սպառնալիքի տակ են հայտնվել արդար նպատակների պաշտպանությամբ»,- ասել է նա:
Գուարիկո նահանգում ելույթի ժամանակ նա ասել է. «Ի՞նչ է արել այդ տղան: Բացահայտել է շատ նուրբ գաղտնիքներ այն մասին, որ ԱՄՆ-ը լրտեսում է ողջ աշխարհում, լսում հեռախոսազրույցները և ուսումնասիրում համացանցում հաղորդագրությունները՝ այդպիսով խախտելով միջազգային իրավական նորմերն ու ժողովուրդների ինքնիշխանությունը»,-ասել է Մադուրոն:
Վենեսուելայի նախագահը նշել է, որ ԱՄՆ իշխանությունները, որոնք փորձում են ձերբակալել Սնոուդենին, ժամանակին ապաստան են տրամադրել ահաբեկիչ Լուիս Պոսադե Կարիլեսին, որը 1976 թվականին պայթեցրել էր Կարակասից թռիչքի դուրս եկած Cubana de Aviacion ավիաընկերության ուղևորատար ինքնաթիռը:
«Սնոուդենը ռումբեր չի տեղադրել և ոչ ոքի չի սպանել, պարզապես մի անգամ ընդդիմացել է՝ դառնալով մեծ խռովության մի մաս, որն իրականացնում է ԱՄՆ-ի երիտասարդությունը»,- հայտարարել է Մադուրոն:
