Ռուսաստանի նախագահ Վլադիմիր Պուտինը հայտարարել է, որ Էդվարդ Սնոուդենը Մոսկվա է ժամանել որպես տրանզիտային ուղևոր և չի հատել Ռուսաստանի պետական սահմանը: Այս մասին հաղորդում է Ria Novosti-ն:
«Պարոն Սնոուդենն, իրոք, Մոսկվա է ժամանել: Մեզ համար դա անսպասելի էր: Նա եկել է որպես տրանզիտային ուղևոր: Նրան պետք չեն ո՛չ մուտքի արտոնագիր, ո՛չ այլ փաստաթղթեր: Որպես տրանզիտային ուղևոր՝ նա իրավունք ունի տոմս գնել և մեկնել ուր ուզում է»,- ասել է Պուտինը:
Բացի այդ, Պուտինն ասել է, որ Ռուսաստանի հասցեին ցանկացած մեղադրանք «բարբաջանք և դատարկաբանություն է»:
«Ռուսական հատուկ ծառայությունները երբեք չեն աշխատել Սնոուդենի հետ: Որքան արագ նա ընտրի իր երթուղու վերջնական կանգառը, այնքան լավ և՛ նրա, և՛ ՌԴ-ի համար»,- հավելել է նախագահը:
Պուտինը նաև հույս ունի, որ այս պատմությունը չի ազդի «ԱՄՆ-ի և ՌԴ-ի գործնական բնույթի հարաբերությունների վրա»