Վրացական GHN լրատվական գործակալության փոխանցմամբ, Ռուսաստանի արտգործնախարար Սերգեյ Լավրովը Московские новости թերթին տված հարցազրույցի ժամանակ դարձյալ հայտարարել է, որ Ռուսաստանը կարող է, առանց Վրաստանի համաձայնության, անդամակցել Առևտրի համաշխարհային կազմակերպությանը (ԱՀԿ).
«Առայժմ մենք շվեյցարացիների միջնորդությամբ խորհրդակցում ենք վրացական կողմի հետ: Ըստ էության, Վրաստանը քաղաքականացնում է այս հարցը: ԱՀԿ-ի կանոններով թույլատրվում է, որ թեկնածու երկիրը կոնսենսուսի բացակայության պայմաններում քվեարկության հիման վրա անդամակցի ԱՀԿ-ին:
Վրաց գործընկերները, մեկնաբանելով նախկինում այս մասին հնչեցրած իմ հայտարարությունը, տեղյակ չեն եղել ԱՀԿ կանոններից: Նրանք չգիտեն, որ անգամ այդպիսի նախադեպ է գրանցվել: ԱՀԿ կանոնները թույլ են տալիս քվեարկության միջոցով անդամակցել նրան»:
Հիշեցնենք, որ մարտի կեսերին էլ Լավրովը հայտարարել էր. «Եթե մեր վրաց գործընկերները շարունակեն իրենց քաղաքականացված դիրքորոշումը, ապա մենք ստիպված կլինենք ԱՀԿ-ին Ռուսաստանի անդամակցության խնդիրը լուծել առանց նրանց մասնակցության: Այդպիսի հնարավորություն մենք ունենք»:
